საბერძნეთში მომხდარმა სარკინიგზო კატასტროფამ საპროტესტო გამოსვლები გამოიწვია

საბერძნეთში მომხდარ მასშტაბურ სარკინიგზო კატასტროფას, რომელმაც ბოლო მონაცემებით, 57 ადამიანის სიცოცხლე იმსხვერპლა, საპროტესტო გამოსვლები და რკინიგზელთა გაფიცვა მოჰყვა.

რკინიგზელთა პროფკავშირის განცხადებით, უსაფრთხოების სისტემა სათანადოდ არ მუშაობს, რის შესახებაც წლების განმავლობაში აფრთხილებდნენ სარკინიგზო კომპანიას და მთავრობას და ტრაგიკული შედეგი სწორედ მათ უმოქმედობას მოჰყვა. პროტესტის ნიშნად, რკინიგზელებმა 2 მარტს, დილიდან გამოაცხადეს 24-საათიანი გაფიცვა.

აქციები გაიმართა ათენში, სალონიკსა და ლარისაში. დემონსტრანტები აპროტესტებდნენ საბერძნეთის მთავრობის პოზიციას, რომ ტრაგედია მხოლოდ "ადამიანური შეცდომის" შედეგი იყო.

გასულ ღამით ათენში, სარკინიგზო კომპანია Hellenic Train-ის ოფისთან, დემონსტრანტებსა და პოლიციელებს შორის შეტაკება მოხდა.

აქციის მონაწილეებმა სამართალდამცველებს ქვები დაუშინეს, მათ კი ცრემლმდენი გაზი გამოიყენეს.

ცნობისთვის, 28 თებერვალს, ღამით, საბერძნეთის ცენტრალურ ნაწილში მდებარე ქალაქ ლარისასთან ერთმანეთს შეეჯახნენ ათენიდან სალონიკისკენ მიმავალი სამგზავრო მატარებელი, რომელშიც 350-ზე მეტი ადამიანი იმყოფებოდა და სალონიკიდან ლარისაში მიმავალი სატვირთო მატარებელი.
დიდი სიჩქარით მიმავალი მატარებლები ერთმანეთის პირისპირ, ერთ ლიანდაგზე აღმოჩნდნენ.
გაუფრთხილებლობით მკვლელობის და უსაფრთხოების წესების დარღვევის მუხლებით ბრალი წაუყენეს ლარისის რკინიგზის სადგურის უფროსს, რომელიც მატარებლების მოძრაობას მართავდა. ის დანაშაულს უარყოფს და აცხადებს, რომ კატასტროფის მიზეზი ტექნიკური გაუმართაობა იყო. თანამდებობიდან გადადგა საბერძნეთის ტრანსპორტის მინისტრი კოსტას კარამანლისი.

ამავე თემაზე:

* საბერძნეთში გლოვა გამოცხადდა