„ნაციონალური მოძრაობა“ როგორც რეჟიმი, ისე გასამართლდება და ის საერთოდ უნდა გაქრეს პოლიტიკური ველიდან, ჩვენ გვჭირდება ჯანსაღი ოპოზიცია, არ გვჭირდება მავნებლები ოპოზიციაში“ - ლევან მაჭავარიანი

„ნაციონალური მოძრაობა“ როგორც რეჟიმი, ისე გასამართლდება და ის საერთოდ უნდა გაქრეს პოლიტიკური ველიდან, - ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა „დღის ქრონიკაში“ ყოფილი ხელისუფლების გასამართლების დაპირების შესახებ საუბრისას განაცხადა.

მისი შეფასებით, 2012 წელს „ქართულ ოცნებას“ გარკვეულ დათმობებზე მოუწია წასვლა, მათ შორის, კოჰაბიტაციის თემაზე. 

„რაც უფრო წლები გადის, საზოგადოება ხედავს, რომ ჩვენ უფრო ვძლიერდებით ეკონომიკურად, ასევე, როგორც დამოუკიდებელი, შემდგარი სუვერენული სახელმწიფო და არის უკვე ისეთი გადაწყვეტილებები, რის შეთანხმებაც ჩვენ არ გვჭირდება, საქართველოშივე ვიღებთ ამ გადაწყვეტილებებს. მით უმეტეს, გადახედეთ ბოლო წლებს, რამდენად შეცვლილია ეს ყველაფერი. ნებისმიერი პატრიოტი ქართველისთვის ეს არის ძალიან მნიშვნელოვანი, როდესაც იგი გრძნობს, რომ ცხოვრობს სუვერენულ სახელმწიფოში”, - განაცხადა ლევან მაჭავარიანმა.

მან ასევე აღნიშნა, რომ პარტიის საპატიო თავმჯდომარემ ბიძინა ივანიშვილმა გუშინდელ გამოსვლაში გაიმეორა ეს დაპირება და ის აუცილებლად შესრულდება.

„ბიძინა ივანიშვილი ძალიან მკაფიოდ დაჰპირდა ჩვენს მოსახლეობას უკვე მეორედ და ამას ჩვენ აუცილებლად შევასრულებთ. „ნაციონალური მოძრაობა“ როგორც რეჟიმი, ისე გასამართლდება და ის საერთოდ უნდა გაქრეს პოლიტიკური ველიდან. ჩვენ გვჭირდება ჯანსაღი ოპოზიცია. არ გვჭირდება მავნებლები ოპოზიციაში. რა ჯობია იმას, როდესაც შენ ხარ ხელისუფლებაში და გაკონტროლებს ამ მავნებელი, არა აგენტი ოპოზიცია. სულ ტონუსში ხარ იმიტომ, რომ იგი სწორ შენიშვნებს გაძლევს, სწორ თემებზე გაკრიტიკებს და არა ის, თეთრზე რომ შავს გეუბნება და ხალხს აგიჟებს, ქართულ კანონს რუსულს ეძახის“, - ისაუბრა ფრაქცია „ქართული ოცნების“ თავმჯდომარის მოადგილემ.

ლევან მაჭავარიანის განცხადებით, გასამართლების დაპირება მხოლოდ სისტემურ დანაშაულებს არ ეხება.

„ძალიან მნიშვნელოვანი მესიჯი გაჟღერდა, არა მარტო იმ საშინელ ქმედებებზე, სისტემურ გაუპატიურებებზე, სისტემურ ბიზნესის რეკეტზე, საძინებლებში თვალთვალზე, ქუჩაში და ციხეებში ადამიანების ხოცვაზე. მხოლოდ ამაზე არ გასამართლდებიან. არსებობს კითხვის ნიშნები, როგორ შეიყვანეს ქვეყანა 2008 წელს პირისპირ რუსეთთან ომში. ამაზეც მოუწევთ კითხვებზე პასუხის გაცემა. მოდით, დაველოდოთ არჩევნების შედეგებს. ღრმად ვართ დარწმუნებულები, რომ ჩვენი მოქალაქეები სწორ არჩევანს გააკეთებენ, მოგვანიჭებენ მანდატს. ჩვენ საკონსტიტუციური უმრავლესობის ამბიცია გვაქვს“, - აღნიშნა ლევან მაჭავარიანმა.