წულუკიანი: კომისიაზე რასაც ვისმენთ, ადასტურებს, რომ მართლები ვართ, როცა ნულოვანი ტოლერანტობა გვაქვს გამოცხადებული „ნაცმოძრაობის“ მიმართ, სააკაშვილი იმყოფება იქ, სადაც მისი ადგილია

„ყველაფერი, რასაც კომისიაზე ვისმენთ, ადასტურებს, რომ ჩვენ მართლები ვართ, როდესაც ნულოვანი ტოლერანტობა გვაქვს გამოცხადებული „ნაციონალურ მოძრაობასთან“ მიმართებით და კიდევ უფრო მაღალ ხარისხში უნდა ავიყვანოთ ეს“, - ამის შესახებ პარლამენტში შექმნილი დროებითი საგამოძიებო კომისიის თავმჯდომარემ, თეა წულუკიანმა კომისიის სხდომაზე განაცხადა.

მისი თქმით, ახალგაზრდა თაობამ ყველაფერი უნდა იცოდეს და დასამალი არაფერი უნდა იყოს.

„არა მხოლოდ თქვენი მონათხრობი, რასაც ახლა ვისმენთ, რაც უკვე მოვისმინეთ, რაც ვიცით, რაზედაც გვიმუშავია სხვადასხვა საქმეზე წარსულში ან კომისიის ფარგლებში ვისაც მომავალში მოვუსმენთ, არამედ ეს ყველაფერი ადასტურებს, რომ ჩვენ მართლები ვართ, როდესაც ნულოვანი ტოლერანტობა გვაქვს გამოცხადებული „ნაციონალურ მოძრაობასთან“ მიმართებით და კიდევ უფრო მაღალ ხარისხში უნდა ავიყვანოთ ეს.

დღეს სააკაშვილი ადამიანურ პირობებში იმყოფება, მაგრამ იმყოფება იქ, სადაც მისი ადგილია და ეს მან უნდა იცოდეს – სწორედ საქართველოს პარლამენტიდან მოსმენილი სიტყვები, სადაც ის 2003 წელს შემოვარდა ვარდით ხელში და ქვეყანა საბოლოოდ გადაიყვანა განვითარების სწორი გზიდან. რაც შეეხება მომავალ თაობას, რა თქმა უნდა, მრჩევლად არ გამოგადგებით, მაგრამ ჩემი აზრია, რომ ახალგაზრდა თაობამ, მათ შორის ჩვენმა შვილებმა, ყველაფერი უნდა იცოდნენ. დასამალი არაფერი უნდა იყოს. ამისთვისაც არის ჩვენი კომისია შექმნილი. რაც არ უნდა მტკივნეული იყოს, მათ უნდა იცოდნენ.

რა თქმა უნდა, ყველაფრის ცოდნას თავისი ასაკი აქვს. ძალიან მტკივნეული რაც არის, ის ადრეულ ასაკში არ ითქმის და არ გაიგება, მაგრამ ყველაფერი უნდა იცოდნენ ისე, რომ არ გახდნენ აგრესიულები, მაგრამ ჰქონდეთ ანალიზის უნარი. ეს უნარი მათ უნდა გავუმახვილოთ, რადგან ჩვენ ყოველთვის არ ვიქნებით იქ, სადაც ვართ. ვგულისხმობ თანამდებობებს. მეტიც, ჩვენ ყოველთვის არ ვიქნებით იქ, სადაც ყველანი ვართ, დედამიწაზე. ის, რაც დარჩება შემდეგ, არის ძალიან მნიშვნელოვანი და მომავალმა თაობამ, რომელიც ზოგი დეპუტატი გახდება, ზოგი - მინისტრი, ზოგიც კერძო სექტორში ისახელებს თავს, ზოგი - აკადემიურ სივრცეში, უნდა იცოდეს, რა არის დაუშვებელი.

ღმერთმა დაიფაროს ჩვენი ქვეყანა, მომავალში ხელისუფლებაში ჰყავდეს კიდევ ერთი სააკაშვილი, მკურნალიძეები, ახალაიები, კალმახელიძეები, ფაცაციები, მუხაძე და ასე შემდეგ. ამ გვარების მატარებელ ღირსეულ ხალხს ბოდიშს ვუხდით, რადგან გვარში ერთი გამოერევა ხოლმე და შემდეგ მთელ გვარს ცხებს ჩირქს“, - განაცხადა თეა წულუკიანმა.