„ფაქტი, რომ გვყავს ორგზის ოლიმპიური ჩემპიონი, ყველაფერს ფარავს“ - რას ამბობს ძიუდოისტთა ნაკრების მთავარი მწვრთნელი

საქართველოს ძიუდოისტთა ნაკრების მთავარმა მწვრთნელმა, ლაშა გუჯეჯიანმა პარიზის ოლიმპიადაზე ქართველი ძიუდოისტების გამოსვლის შემდეგ მედიასთან კომენტარი გააკეთა და ასპარეზობა შეაფასა. 

„ჩემში ბევრი ემოციაა. სიხარულისა და მოწყენის უამრავი საფუძველი მაქვს. ფაქტობრივად, ასეთი დაძაბული, ასეთი სხვადასხვანაირი ემოცია არცერთ შეჯიბრებაზე არ მქონია. მაგრამ ის ფაქტი, რომელიც რეკორდული და ისტორიულია, რომ გვყავს ორგზის ოლიმპიური ჩემპიონი, რა თქმა უნდა, ყველაფერს ფარავს. მთავარი და ყველაზე მნიშვნელოვანი ესაა.

ქართული ძიუდოს ისტორიაში მოხდა ის ფაქტი, რომ გვყავს ორგზის ოლიმპიური ჩემპიონი, გვაქვს ორი ვერცხლის მედალი ოქროსთან ერთად.

მაგრამ ჩემს უარყოფით ემოციას იწვევს ის ფაქტი, რომ დასანანი შეხვედრები დავთმეთ. გუნდის რამდენიმე ლიდერმა მედლის რეალური შანსი დაკარგა, მაგრამ სპორტია ეს. ფაქტია, ქართული ძიუდო თავის სიტყვას ამბობს, რომ მოწინავეა, ლიდერია მსოფლიო ძიუდოში. ვფიქრობ, მომავალი გვაქვს, წინ მივდივართ. რომ არა ის პრობლემები, რაც თუნდაც თუშიშვილის შემთხვევაში შეიქმნა, ვფიქრობ, ჩვენ მართლაც შეგვეძლო არა მხოლოდ ტოკიოში ნაჩვენები შედეგის გამეორება, არამედ გაუმჯობესებაც.

ვულოცავ ჩემპიონს, მედალოსნებს, ქართული სპორტის გულშემატკივრებს, ფედერაციას. მინდა, დიდი მადლობა გადავუხადო ჩემს გუნდს, ვინც ამ ნაკრების მომზადებაში ერთგულად და თავდადებით დაიხარჯა და მათ, ვისაც ჩვენი სჯეროდა“, - განაცხადა ლაშა გუჯეჯიანმა.

ცნობისთვის, საქართველოს ძიუდოისტთა ნაკრებმა პარიზის ოლიმპიადაზე გუნდურ შეჯიბრებაში ასპარეზობა დაასრულა. ჩვენი გუნდი მერვედფინალში იტალიასთან 3:4 დამარცხდა.