ილია სულამანიძე ბაქოს გრან სლემის გამარჯვებულია

აზერბაიჯანის დედაქალაქ ბაქოში დასრულდა ჰეიდარ ალიევის სახელობის გრან სლემი ძიუდოში. საქართვთლოს ნაკრების წევრებმა 1 ოქროს და 2 ვერცხლის მოპოვება შეძლეს, ჩემპიონი გახდა ილია სულამანიძე(100კგ), ხოლო გურამ თუშიშვილმა(+100კგ) და ეთერ ლიპარტელიანმა(57კგ) ვერცხლის მედლები დაისაკუთრეს.ა

ახალგაზრდული ოლიმპიური თამაშების ვერცხლის და მსოფლიო ჩემპიონატის ბრინჯაოს მედალოსანი სულამანიძე ასპარეზობას მეორე წრიდან შეუდგა. დაამარცხა ნეიტრალური ქვეყნის წარმომადგენელი, ბრიტანელი, ხორვატი და ფრანგი მეტოქეები, ოქროს მედლისთვის შეხვედრაში კი ვაზარით მოუგო ნეიტრალური ქვეყნის წარმომადგენელ მატვეი კანიკოვსკის და კვარცხლბეკის პირველ საფეხურზე ავიდა.

ოქროს მედლამდე ნაბიჯი დააკლდა მძიმე წონაში ოლიმპიური თამაშების ვერცხლის და მსოფლიო ჩემპიონატების ოქროს და ბრინჯაოს, ასევე ევროპის ჩემპიონატების ოქროს, 3 ბრინჯაოს და ევროპული თამაშების ოქროს მედალოსან გურამ თუშიშვილს. მომავალი ფინალისტი შეჯიბრში მეორე წრიდან ჩაება. მოუგო ტაჯიკ, ნეიტრალური ქვეყნის წარმომადგენელ  და ყაზახ მეტოქეებს, მაგრამ გადამწყვეტ შეხვედრაში იპონით დამარცხდა ნეიტრალური ქვეყნის წარმომადგენელ მსოფლიოს მოქმედ ჩემპიონ ინალ ტასოევთან.

მხოლოდ ფინალში დამარცხდა ეთერ ლიპარტელიანი ოლიმპიურ ჩემპიონ ნორა გიაკოვასთან, მანამდე კი ბრაზილიელ, ფრანგ და პორტუგალიელ მეტოქეებს იოლად მოუგო.

საქართველოს ნაკრებმა ჩათვლაში მეორე ადგილი დაიკავა, ასევე მეორე ადგილი ერგო ქალთა და კაცთა საერთო გუნდურ ჩათვლაში.