აშშ-ის ეროვნული დაზვერვის დირექტორმა სამთავრობო პლატფორმის პირადი საკითხებისთვის გამოყენების გამო, ასზე მეტი თანამშრომელი სამსახურიდან გაათავისუფლა

აშშ-ის ეროვნული დაზვერვის დირექტორმა, ტულსი გაბარდმა ასზე მეტი თანამშრომელი სამსახურიდან გაათავისუფლა. ინფორმაციას ამის შესახებ „ენბისი ნიუსი“ ავრცელებს.

როგორც მედია წერს, თანამშრომლები 15 სხვადასხვა სააგენტოში მუშაობდნენ. მათი სამსახურიდან გაშვების მიზეზი სამთავრობო ჩათპლატფორმის პირადი საკითხების განსახილველად გამოყენება იყო. კერძოდ, როგორც ირკვევა, აშშ-ის დაზვერვის თანამშრომლების ნაწილი სამსახურებრივ ჩათებში პოლიამორულ ურთიერთობებზე, სქესის შეცვლის ოპერაციებსა და პოლიტიკის საკითხებზე საუბრობდა.

„ფოქსისთვის“ მიცემულ ინტერვიუში გაბარდმა განაცხადა, რომ უკვე გასცა განკარგულება ამგვარ განხილვებში მონაწილე ყველა პირის გათავისუფლების შესახებ. დასჯილ თანამშრომლებს ასევე შეუზღუდავენ საიდუმლო ინფორმაციასთან წვდომასაც. გაბარდის თქმით, სამსახურებრივ ჩათებს ეროვნული უსაფრთხოების სააგენტო კურირებდა.

გაბარდის თქმით, სამსახურიდან გათავისუფლებული თანამშრომლების ქცევა არღვევს „პროფესიონალიზმის ძირითად წესებსა და სტანდარტებს“.

გაბარდმა განაცხადა, რომ თანამშრომლების გათავისუფლება სადაზვერვო სამსახურებში არაკეთილსინდისიერად მოქმედი პირების გამოვლენის უფრო მასშტაბურ ძალისხმევის ემსახურება. საკადრო ცვლილებებმა, გაბარდის ჩანაფიქრით, უნდა აღადგინოს საზოგადოების ნდობა აშშ-ის სადაზვერვო საზოგადოებისადმი.