The Washington Post: შესაძლოა, 2100 წლისთვის უკრაინის მოსახლეობა 15 მილიონამდე შემცირდეს

უკრაინის მოსახლეობა სწრაფად მცირდება და ამან, შესაძლოა, სერიოზული გავლენა მოახდინოს ქვეყნის ეკონომიკურ სიჯანსაღეზე, პოლიტიკურ სტაბილურობაზე, ეთნიკურ მრავალფეროვნებასა და მომავალში, ომის წარმოების უნარზე. ამის შესახებ სტატიას The Washington Post ავრცელებს.

ოფიციალური პირების შეფასებით, დღეისთვის უკრაინის მოსახლეობის რაოდენობა, რუსეთის მიერ ოკუპირებული ტერიტორიების ჩათვლით, 36 მილიონზე ნაკლებია. სტატიაში აღნიშნულია, რომ ეს რიცხვი შეფასებითია და შესაძლოა, გაცილებით ნაკლებიც იყოს.

„თუ დემოგრაფიული ტენდენციები გაგრძელდა, მოსალოდნელია, რომ უკრაინის მოსახლეობის რაოდენობა 2100 წლისთვის 15 მილიონზე ჩამოვიდეს“, - წერს WP.

როგორც სტატიაშია აღნიშნული, უკრაინაში დემოგრაფიული მაჩვენებლები ომამდეც ერთ-ერთი ყველაზე უარესი იყო მსოფლიოში. 2001 წელს, ქვეყანაში საშუალოდ 1.1 ბავშვი დარეგისტრირდა თითო ქალზე, რაც „ჩანაცვლების კოეფიციენტზე“ (2.1) რაც გაცილებით დაბალია.

„მომდევნო წლებში, ეს მაჩვენებელი გაუმჯობესებისკენ წავიდა, თუმცა, შემდეგ ომი დაიწყო და შობადობა 1.0-ზე დაბლა დაეცა“, - წერს სტატიის ავტორი გაეროს მოსახლეობის ფონდის მიერ ივლისში გამოქვეყნებულ მონაცემებზე დაყრდნობით.

კიევის რეპროდუქციული მედიცინის კლინიკა „დედა და შვილი“ სპეციალისტი ვიტალი რადკო ამბობს, რომ პრობლემას წარმოადგენს არა ქვეყნიდან მხოლოდ გადინება, არამედ უკრაინაში დარჩენილი მოსახლეობის განწყობებიც.

„მოსახლეობის ის ნაწილი, რომელსაც შვილები უნდა ჰყავდეს, რომლებსაც ოჯახების ყოლა შეუძლიათ, მნიშვნელოვნად შემცირდა. რეპროდუქციული ასაკის მქონე ქალების დიდი რაოდენობა უკრაინის ფარგლებს გარეთ ცხოვრობს, ხოლო მამაკაცები ან იბრძვიან, ან დაღუპულები არიან, ან დაჭრილები, ანაც ქვეყნიდან წასულები.

ამას დამატებული, ვინც დარჩა, ზოგი სტრესშია, ზოგი ეკონომიკურ სტაგნაციასა და სიღარიბეში. ყველას არ სურს, არ შეუძლია ან არ არის მზად ოჯახის შესაქმნელად“, - ამბობს რეპროდუქციის სპეციალისტი.