ლევან მაჭავარიანი ოპოზიციაზე: არანაირად არ აწყობთ მონაწილეობის მიღება თვითმმართველობის არჩევნებში, არიან განულებულები და ერიდებიან იმას, რომ მათი რეიტინგი არჩევნებში გამოჩნდეს

„არანაირად არ აწყობთ მონაწილეობის მიღება თვითმმართველობის არჩევნებში, ვინაიდან კიდევ ერთხელ გამომჟღავნდება, თუ რა რეიტინგი აქვთ“, - ასე გამოეხმაურა საპარლამენტო ფრაქცია „ქართული ოცნების“ თავმჯდომარის მოადგილე ლევან მაჭავარიანი ოპოზიციური პარტიების ნაწილის განცხადებას, რომ თვითმმართველობის არჩევნებში მონაწილეობას არ მიიღებენ.

მაჭავარიანის თქმით, ოპოზიციის რეიტინგი განულებულია და ამ ყველაფრის არჩევნებში გამოჩენას ერიდებიან.

„რადიკალური ოპოზიციის გადასაწყვეტი ეს არ იქნება. როგორ დავალებასაც მისცემენ უცხოეთიდან, იმის მიხედვით იმოქმედებენ. თუმცა, რა თქმა უნდა, მათ, თავიანთი გადმოსახედიდან, არანაირად არ აწყობთ მონაწილეობის მიღება თვითმმართველობის არჩევნებში, ვინაიდან კიდევ ერთხელ გამომჟღავნდება, თუ რა რეიტინგი აქვთ. ეს რეიტინგი არის კიდევ უფრო მკვეთრად შემცირებული, ვიდრე ჰქონდათ საპარლამენტო არჩევნების დროს, იქიდან გამომდინარე, რომ თავიანთ ამომრჩეველსაც გაუწბილეს იმედები. მთლიანად ემსახურებიან, როგორც ეს მანამდე იყო, მაგრამ ახლა გაორმაგებული ძალებით, ქვეყანაში ქაოსის დათესვას. არიან განულებულები და აქედან გამომდინარე, რა თქმა უნდა, ერიდებიან იმას, რომ ეს ყველაფერი გამოჩნდეს უკვე არჩევნებში“, - განაცხადა ლევან მაჭავარიანმა.