„რუსთაველზე შეკრებილებმა ხელოვნურად გადაკეტეს გზის სავალი ნაწილი“ - სამართალდამცავი

გამჭვირვალობის შესახებ კანონის წინააღმდეგ გამართული აქციის მონაწილეებმა რუსთაველის გამზირზე გზის სავალი ნაწილი გადაკეტეს. ამას, სამართალდამცველების მხრიდან მოჰყვა გაფრთხილება - გაეთავისუფლებინათ გზის სავალი ნაწილი, წინააღმდეგ შემთხვევაში, პოლიციის განმარტებით, მოხდებოდა მათი იდენტიფიცირება და კანონის შესაბამისად, ჯარიმების გამოწერა.

მოგვიანებით, პოლიციის ერთ-ერთმა თანამშრომელმა გოგა მემანიშვილმა მედიასთან გაკეთებულ კომენტარში განმარტა, რომ ხალხის რაოდენობიდან გამომდინარე, გზის გადაკეტვა არ იყო აუცილებელი.

„აღნიშნულთან დაკავშირებით განმარტება გავაკეთეთ. რამდენიმეჯერ მოვუწოდეთ აქციის მონაწილეებს და ასევე ორგანიზატორებს, რომ გაათავისუფლონ გზის სავალი ნაწილი, რადგან გზის დაკეტვის საჭიროება ახლა არ არის ხალხის რაოდენობიდან გამომდინარე. მოვახდენთ იმ პირების იდენტიფიცირებას, ვინც ხელოვნურად კეტავს გზის სავალ ნაწილს და შესაბამისად, სასამართლო იმსჯელებს“, - განაცხადა სამართალდამცავმა.

მისი განმარტებით, ადმინისტრაციული სამართალდარღვევათა კოდექსის შესაბამისად, დაუმორჩილებლობის შემთხვევაში აქციის მონაწილეები 500, ხოლო ორგანიზატორები 5000 ლარამდე ჯარიმას დაექვემდებარებოდნენ.

პოლიციის აღნიშნული მითითება აქციის ერთ-ერთმა ორგანიზატორმა პროვოკაციის მცდელობად შეაფასა და საბოლოოდ, აქციის მონაწილეებს პარლამენტის შენობასთან გადანაცვლებისკენ მოუწოდა.