სურსათის ეროვნული სააგენტოს უფროსი ზურაბ ჩეკურაშვილი რძის კონკრეტულ პარტიაზე: მთელი ქვეყნის მასშტაბით ამოღებულია ქსელში გაშვებული პროდუქცია. სურსათის ეროვნული სააგენტოს თანამშრომლები მონიტორინგს აწარმოებენ

 სურსათის ეროვნული სააგენტოს უფროსის ზურაბ ჩეკურაშვილის განცხადებით, სააგენტოს მიერ დალუქულია რძის ის პარტია, რომელშიც დარღვევები აღმოჩნდა. გარდა ამისა, ამოღებულია მთელი ქვეყნის მასშტაბით ქსელში გაშვებული პროდუქცია. სააგენტოს დირექტორი აცხადებს, რომ პროცესს მონიტორინგს უწევენ სპეციალისტები.

„მთელი ქვეყნის მასშტაბით ამოღებულია ქსელში გაშვებული პროდუქცია. სურსათის ეროვნული სააგენტოს თანამშრომლები ამის მონიტორინგს აწარმოებენ - დადიან ქსელებში, ამოწმებენ. საბავშვო ბაღებში გასულია ჩვენი ჯგუფები და იქიდან მოსულია ინფორმაცია, რომ რძის პროდუქტების ნიმუშები აღებულია და ყველაფერი წესრიგშია. ანუ ამ მხრივ ყველაფერი კონტროლს ექვემდებარება და არანაირი პანიკის საფუძველი არ არსებობს. ჩვენ საქართველოში მიღებული გვაქვს უმკაცრესი ზომები და ნორმები, რომელიც სრულ ჰარმონიზაციაშია ევროკავშირის სტანდარტებთან”, - განუცხადა „ქრონიკას“ ზურაბ ჩეკურაშვილმა.

სურსათის ეროვნულმა სააგენტომ 3 აპრილს გაავრცელა ინფორმაცია, რომ „სოფლის ნობათის“ რძის ნიმუშებში გამოვლინდა აფლატოქსინი და მოუწოდა მომხმარებლებს, არ გამოიყენონ აღნიშნული რძე. სურსათის ეროვნული სააგენტოს ცნობით, „სოფლის ნობათის“ იმპორტირებული რძის ხუთი ნიმუშის ბაზრიდან ამოღება და დალუქვა დაიწყო.

სურსათის ეროვნული სააგენტოს უფროსის ზურაბ ჩეკურაშვილის განმარტებით, 2016 წლიდან, საქართველოს კანონმდებლობით, სურსათში აფლატოქსინ M1-ის შემცველობის უმაღლესი სტანდარტი 0,05მკგ/ლ-ით განისაზღვრა, რაც მსოფლიოში ყველაზე მკაცრი სტანდარტია.