თეა წულუკიანი: ოპოზიციის წარმომადგენლები ქართულ პარლამენტში რომ იყვნენ, სტრასბურგში ჩემთან ერთად იქნებოდნენ პლენარულ დარბაზში - დერეფანში სავარძლებზე სხედან, ხან რომელ კაბინეტთან არიან ატუზულები და ხან რომელთან

ოპოზიციის წარმომადგენლები ქართულ პარლამენტში რომ იყვნენ, იქნებოდნენ ჩემთან ერთად პლენარულ დარბაზში, დერეფანში სავარძლებზე სხედან, ხან რომელ კაბინეტთან არიან ატუზულები და ხან – რომელთან, – ამის შესახებ „ქართული ოცნების“ წევრმა თეა წულუკიანმა ევროპის საბჭოს საპარლამენტო ასამბლეის სხდომის დაწყებამდე განაცხადა.

წულუკიანის თქმით, ეს ოპოზიციის წარმომადგენლების სისულელეზე, სისუსტესა და პოლიტიკური გამჭრიახობის არქონაზე მეტყველებს.

„ოპოზიციას და არასამთავრობო სექტორს რაც შეეხება, დაახლოებით 20 ადამიანი დადის აქ, დერეფნებში. ოპოზიცია, რომლის წარმომადგენლებსაც ჯიბეში უდევთ ქართული პარლამენტის მანდატი, შეუძლიათ, ქართულ პარლამენტში შევიდნენ, იყვნენ ჩემს დელეგაციაში და აქაურ პლენარული სხდომის დარბაზში შევიდნენ, ვერ შედიან, რადგან ქართულ პარლამენტში არ არიან შესული და დერეფანში სავარძლებზე სხედან. ეს, რა თქმა უნდა, მათ სისულელეზე, სისუსტესა და პოლიტიკური გამჭრიახობის არქონაზე მეტყველებს, რადგან ისინი ქართულ პარლამენტში რომ იყვნენ, იქნებოდნენ ჩემს დელეგაციაში, როგორც ოპოზიციონერები. ისინი ჩემთან ერთად იქნებოდნენ პლენარულ დარბაზში, სადაც მე და გივი მიქანაძე სიტყვით გამოვდივართ. პლენარულ დარბაზშივე საჯაროდ შეძლებდნენ ჩემთან დაპირისპირებას. მათ ეს პოლიტიკური შესაძლებლობა არ გამოიყენეს. დერეფანში რომ ჩავივლი ხოლმე, ხან რომელ კაბინეტთან არიან ატუზულები და ხან რომელთან. ეს არც მათ მატებს ღირსებას, რომელიც არ ვიცი, აქვთ თუ არა და არც იმ საქმეს ადგება, რომელიც მათი საქმეა, მათაც ხომ აქვთ პოლიტიკური მიზანი. ამიტომაც არის მათი ქმედება ანტისახელმწიფოებრივი და ამას აქ ყველა ხედავს, ჩუმად ამბობს კიდეც, მაგრამ საჯარო დისკუსია სხვა თემაა“, – განაცხადა თეა წულუკიანმა.