მსოფლიო ბანკმა შავი ზღვის კაბელის პროექტის მოსამზადებელი სამუშაოებისთვის საქართველოს 35 მლნ აშშ დოლარი გამოუყო

მსოფლიო ბანკმა მხარი დაუჭირა საქართველოსთვის 35 მლნ აშშ დოლარის კრედიტის გამოყოფის გადაწყვეტილებას, რომელიც შავი ზღვის ფსკერზე ელექტროგადამცემი კაბელის მშენებლობისთვის მოსამზადებელი სამუშაოების ჩატარებას ითვალისწინებს. ამის შესახებ worldbank.orgიუწყება.

გადაწყვეტილებას მსოფლიო ბანკის აღმასრულებელ დირექტორთა საბჭომ მხარი დაუჭირა. ის ენერგოსისტემების გაერთიანებას გზით საქართველოს ენერგეტიკული უსაფრთხოების ამაღლებას ისახავს მიზნად.

პროგრამა სახელწოდებით ESPIRE სამი ეტაპისგან შედგება. მისი პოტენციური დაფინანსების ოდენობა 500 მლნ აშშ დოლარს შეადგენს. ამ თანხებით საქართველომ ინსტიტუციონალური პოტენციალი უნდა გააუმჯობესოს და წყალქვეშა კაბელების პროექტი შექმნას, გააძლიეროს ელექტროენერგიის გადაცემის შიდა ქსელი და სამხრეთ კავკასიასა და სამხრეთ-აღმოსავლეთ ევროპას შორის პირდაპირი ელექტროგადამცემი ხაზი შექმნას. გარდა ამისა, იგეგმება ინტერნეტ-კაბელის გაყვანაც, რომელიც ინტერნეტთან მიერთების ხარისხს გააუმჯობესებს და ფასს შეამცირებს, ასევე მთლიანად შავი ზღვის გავლით ციფრულ კავშირს გააუმჯობესებს.

მოსამზადებელი პროგრამა წინ უძღვის BSSC-ს პროექტს, რომელიც შავი ზღვის ფსკერზე ელექტრო და ოპტიკურ-ბოჭკოვანი კაბელების გაყვანას ითვალისწინებს, რომელიც საქართველოს და რუმინეთს ერთმანეთთან დააკავშირებს.

„შავი ზღვის წყალქვეშა კაბელი არის უმნიშვნელოვანესი პროექტი, რომლის ინიციატორი საქართველოა. ის სამხრეთ კავკასიის ქვეყნებს ევროპის ენერგეტიკულ სისტემასთან დააკავშირებს. მსოფლიო ბანკის დაფინანსება არის ერთგვარი საფუძველი, რომელიც მთელი პროექტის განსახორციელებლად ფუნდამენტურ ხასიათს ატარებს,“- განაცხადა საქართველოს ვიცე-პრემიერმა, ეკონომიკის და მდგრადი განვითარების მინისტრმა ლევან დავითაშვილმა.

მისი თმით, BSSC საქართველოში ინფრასტრუქტურის გაუმჯობესებას, ახალი სამუშაო ადგილების შექმნას და ქვეყნის ეკონომიკაში დამატებით ინვესტიციებს ითვალისწინებს. ამ კაბელის გაყვანით საქართველო ევროკავშირის უმნიშვნელოვანესი პარტნიორი ხდება და ეს სამხრეთ კავკასიის და თავად ევროკავშირის ენერგეტიკული უსაფრთხოების უზრუნველყოფას ხელს შეუწყობს. ასევე განვითარდება განახლებადი ენერგიის სფერო და რეგიონებს შორის ტრანზიტული შესაძლებლობები გაიზრდება.

პროგრამა ESPIRE MPA არის მსოფლიო ბანკის Global Challenge-ის ჯგუფის პროექტების, „ენერგეტიკული ტრანსფორმაცია და ეფექტიანი წვდომის“ და „დიგიტალიზაციის აჩქარების“ ნაწილი. მსოფლიო ბანკსა და საქართველოს შორის 2025-2029 წლებზე თანამშრომლობის ჩარჩო პროგრამა არსებობს, რომლის მიზანია ქვეყნის კონკურენტუნარიანობის, კავშირის და ინტეგრაციის გაზრდა.