„სანამ ამერიკა და ევროპა რამეს მოიფიქრებენ, ქართველებს ის უკვე მოფიქრებული აქვთ საუკუნეების წინ“ - ლელა კაკულია

ქართველი წინასწარმეტყველის ლელა კაკულიას ოფიციალურ ფეისბუკ გვერდზე, ხშირად ქვეყნდება მისი წინასწარმეტყველებებიდან ამონარიდები.

გთავაზობთ 2012 წლით დათარიღებულ, სხვადასხვა წინასწარმეტყველებებს, რომელიც საქართველოს დღევანდელ პროცესებს ასახავს. 

„2012 წელი, 7 ივლისი

საქართველო და ქართველი ხალხი არ არის ხელწამოსაკრავი. სანამ ამერიკა და ევროპა რამეს მოიფიქრებენ, ქართველებს ის უკვე მოფიქრებული აქვთ საუკუნეების წინ.

მხოლოდ ხანდახან, დროის რომელიღაც მონაკვეთში, ძალა აღმართს ხნავს. მაგრამ საქართველოში მოდის ძალა, რომელიც ერთდროულად აღმართსაც მოხნავს და დაღმართსაც.

საქართველოს მომავალში მნიშვნელოვანი ადგილი უჭირავს წამყვანი ქვეყნების გვერდით...

ქართველ პოლიტიკოსებს მხოლოდ სამ სიტყვას ვეტყოდი: ფრთხილად! ფრთხილად! ფრთხილად!

2012 წელი, 22 ივლისი

საქართველო მომავალში ძლიერი და ანგრიშგასაწევი ქვეყანაა, ასევე ევროპის ნაწილი, დაბრუნებული ტერიტორიებით — აფხაზეთითა და სამაჩაბლოთი, მერე კი იმ ტერიტორიებით, რომლებიც ჩვენს მეზობელ ქვეყნებს [უფრო ადრე] აქვთ მითვისებული. მათი დაბრუნების დროც დადგება.

2013 წელი, 19 მარტი

რუსეთი ცდილობს, რომ საქართველოში შექმნილი სიტუაციით ისარგებლოს, ვითომ საქართველოს რუსეთი სჭირდება (და კიდევ უამრავ რამეს იძახიან) და ამით ცდილობს მსოფლიოს დაანახვოს, რომ საქართველო რუსეთისკენ მიიწევს და არა ევროპა-ამერიკისკენ.

<...> მაგრამ ნატოშიც შევდივართ და ევროკავშირშიც. ამას სიამოვნებით ვიმეორებ და ყოველთვის გავიმეორებ საქართველოს მტრების გულის გასახეთქად მანამ, სანამ არ შევალთ.

იცოდეთ, დედამიწაზე ორი ადამიანიც რომ დარჩეს, ერთი აუცილებლად ქართველი იქნება; ერთი სახელმწიფოც რომ დარჩეს, ეს საქართველო იქნება!“, - აღნიშნავს ლელა კაკულია მის წინასწარმეტყველებებში.