სოზარ სუბარი საამიროების ინვესტიციაზე: ასეთი კომპანიის შემოსვლას მოჰყვება სხვა ინვესტიციები, რაც იმას ნიშნავს, რომ ინვესტორები გენდობიან, ქვეყანაში არეულობის არ ეშინიათ და იციან, რომ ყველაფერი სტაბილურად იქნება

„2025 წელი ეკონომიკურად იქნება კიდევ უფრო წელში გამართული“, - განაცხადა ჟურნალისტებთან საუბრისას პარლამენტის ვიცე-სპიკერმა, „ხალხის ძალის“ თავმჯდომარემ სოზარ სუბარმა.

ის დარწმუნებულია, რომ ოპოზიციის მცდელობა, ზიანი მიაყენოს ქვეყნის ეკონომიკას, მიზანს ვერ მიაღწევს.

სუბარის თქმით, მართალია, ძალადობრივმა აქციებმა გამოიწვია ეკონომიკური ზრდის დაახლოებით ერთთვიანი შეფერხება, მაგრამ, მიუხედავად მცირეხნიანი რყევისა, საქართველო ეკონომიკური ზრდის მაჩვენებლით მსოფლიოში ერთ-ერთი ლიდერი ქვეყანაა.

„ოპოზიციამ მცირეხნიან რყევას მართლაც მიაღწია ეკონომიკაში, როდესაც ეკონომიკის ზრდის მაჩვენებელი ნოემბერში 7,5 პროცენტი იყო. დეკემბერში ეს ციფრი, სავარაუდოდ, კიდევ უფრო დაბალი იქნება - ამას აჩვენებს მონაცემები და ორ დღეში ალბათ გამოქვეყნება კიდევაც.

თუმცა, ეს არის მცირეხნიანი რყევა. მთლიანობაში შარშანდელი წლის ეკონომიკური ზრდა დაახლოებით 9 პროცენტი იქნება, რაც ყველაზე მაღალია არა მხოლოდ ევროპაში, არამედ მთლიანად ევრაზიის კონტინენტზე და მსოფლიოშიც ერთ-ერთ ყველაზე მაღალია. იანვრიდან უკვე იგრძნობა, რომ ეს დროებითი შეფერხება გადალახულია და ეკონომიკური ზრდა ისევ ჩადგება იმ კალაპოტში, რომელსაც შეჩვეული ვიყავით ამ ბოლო რამდენიმე წლის განმავლობაში.

ასე რომ, საქართველო 2025 წელს ეკონომიკურად იქნება კიდევ უფრო წელში გამართული. ამას ის ის ექვსმილიარდიანი ინვესტიციაც შეუწყობს ხელს, რომელსაც პრემიერმინისტრმა ირაკლი კობახიძემ მოაწერა ხელი არაბთა გაერთიანებულ საამიროებში.

გარდა იმისა, რომ ექვსი მილიარდი დოლარი დიდი თანხაა საქართველოსნაირი ეკონომიკის მქონე ქვეყნისთვის, ასეთი კომპანიის შემოსვლას მოჰყვება სხვა ინვესტიციები, რადგან ასეთი ინვესტიცია ნიშნავს, რომ ინვესტორი გენდობა, მას ქვეყანაში არეულობის არ ეშინია და იცის, რომ ყველაფერი სტაბილურად იქნება. ეს არის ის, რაც ხვალ საქართველოს გახდის უფრო ძლიერს, უფრო სუვერენულს, უფრო დამოუკიდებელს და ჩვენს მოქალაქეებს ექნებათ გაცილებით მაღალი შემოსავლები, ვიდრე აქვთ დღეს. სულ რაღაც ორი-სამი წელი დასჭირდება ამ ამოცანების შესრულებას“ - განაცხადა სოზარ სუბარმა.