მაკა ბოჭორიშვილი: ხელისუფლებამ უარი თქვა ომზე, უარი უთხრა არასტაბილურობას ჩვენს ქვეყანაში და სწორედ ამიტომაც მივიღეთ გარკვეული ძალების მხრიდან ამხელა ზეწოლა საქართველოს სახელმწიფოზე

 მარტო ფარულ წახალისებას არა, ჩვენ ღია წახალისებასაც ვხედავთ ხოლმე [უცხოელი აქტორებისგან] იმ ქმედებების და იმ ნაბიჯების, როდესაც საქართველოში მოქმედებენ გარკვეული ჯგუფები, რომლებიც ცალსახად აგრესიულები არიან, ცალსახად უპირისპირდებიან საქართველოს სახელმწიფო ინსტიტუტებს, ყველაფერს, რაც დემოკრატიის საფუძველია, - განაცხადა გადაცემა „იმედი LIVE“-ში საგარეო საქმეთა მინისტრმა მაკა ბოჭორიშვილმა.

მისი თქმით, საქართველოს სჯიან იმ ნაბიჯების გამო, რომელიც ხელისუფლებამ გადადგა - ეს ნაბიჯები კი მშვიდობასა და ქვეყანაში სტაბილურობას ემსახურებოდა.

„დემოკრატიული ინსტიტუტების მუშაობას უპირისპირდებიან, დემოკრატიულ არჩევანს უპირისპირდებიან და ასეთ ჯგუფებზე ამბობ, რომ ეს არის შენი დასაყრდენი ამ ქვეყანაში, ამ ჯგუფებს აფინანსებ, შენ დგახარ ამ ჯგუფების უკან და მაშინ მოდით ვთქვათ, რა არის ის ინტერესი, რაც ერთობლივად ამოძრავებთ ამ ჯგუფების დამფინანსებლებს და თავად ამ ჯგუფებს საქართველოში. ბოლო პერიოდში ვხედავთ ერთადერთ რამეს - საქართველო ისჯება იმ არჩევანის გამო, რაც გააკეთა საქართველოს ხელისუფლებამ. საქართველოს ხელისუფლებამ გააკეთა არჩევანი მშვიდობისათვის და არა ომისკენ, უარი თქვა ომზე, უარი უთხრა ომს, უარი უთხრა არასტაბილურობას ჩვენს ქვეყანაში და სწორედ ამიტომაც მივიღეთ ჩვენ გარკვეული ძალების მხრიდან ამხელა ზეწოლა საქართველოს სახელმწიფოზე. ეს გრძელდება, ეს ძალები არსად წასულან, კვლავ და კვლავ არსებობს ინტერესი იმისა, რომ საქართველოში იყოს გარკვეული დესტაბილიზაციის კერა. ვხედავთ იმასაც, რამხელა წინააღმდეგობა აქვს თუნდაც უკრაინაში სამშვიდობო პროცესს, ვხედავთ, ვის რა ინტერესი აქვს იმისათვის, რომ გახანგრძლივდეს საომარი მოქმედებები. ეს პირდაპირ კავშირშია საქართველოსთან, ჩვენს ქვეყანაში სტაბილურობასთან“, - განაცხადა ბოჭორიშვილმა.