„სკოლებში სამხედრო განათლების შეტანა ხელს უწყობს ეროვნული იდენტობის გაძლიერებას ჩამოყალიბებას“ - გიორგი ამილახვარი

„ჯარის ბანაკის და სკოლებში სამხედრო განათლების შეტანა ხელს უწყობს ეროვნული იდენტობის გაძლიერებას, სახელმწიფოებრივი აზროვნების ჩამოყალიბებას“,- ამის შესახებ განათლების მინისტრმა გიორგი ამილახვარმა „დღის ქრონიკაში“ განაცხადა.

„დღეს პრემიერთან და თავდაცვის მინისტრთან ერთად გავხსენით ჯარის ბანაკი. უკვე მეორე წელია, აღნიშნული პროექტი მიმდინარეობს. ჩვენ სკოლებშიც შევიტანეთ თავდაცვისა და სამხედრო საქმის შესწავლა ჩვენი მოსწავლეებისთვის, სადაც სამხედრო ინსტრუქტორები მიდიან და გაკვეთილებს უტარებენ სკოლებში მაღალი კლასის მოსწავლეებს და წლიდან წლამდე დაინტერესებული ბავშვების რაოდენობა საგრძნობლად იზრდება. ბუნებრივია დამაგვირგვინებელი ფაზა არის ბანაკი“,- აღნიშნა ამილახვარმა.

მისი თქმით, წელს ჯარის ბანაკზე მოთხოვნა წინა წელთან შედარებით საგრძნობლად გაზრდილია.

„წელს არის მონაწილეთა რაოდენობა გაორმაგებული. ბანაკს დაემატა ორი ახალი ლოკაცია და შესაბამისად, მოხდა ტერიტორიული არეალებისა და რაოდენობის გახსნა. ეს პირდაპირ ეხმიანება პოლიტიკას და ზოგადი განათლების იმ ეროვნული მიზნებს, რომელიც ახლახან პარლამენტმა დაამტკიცა. ჩვენი ამოცანაა, სკოლაშივე შევიტანოთ ისეთი ამოცანის დანერგვა, რომელიც ხელს უწყობს ეროვნული იდენტობის გაძლიერებას, სახელმწიფოებრივი აზროვნების ჩამოყალიბებას, პატრიოტიზმის ელემენტების გაძლიერებას. ჩვენი კულტურის ისტორიის, ოჯახის პატივისცემას“,- განაცხადა ამილახვარმა.