,,ღმერთის მადლობელი ვარ, რომ საქართველოში დავიბადე - მინდა, ჩემი ქვეყნისთვის რაღაც განსაკუთრებული გავაკეთო” - ხვიჩა კვარაცხელია

 ფეხბურთის ასოციაციათა საერთაშორისო ფედერაცია (FIFA) „ნაპოლისა“ და საქართველოს ეროვნული ნაკრების ფეხბურთელ ხვიჩა კვარაცხელიასთან ჩაწერილ ინტერვიუს აქვეყნებს.

ინტერვიუში ის შვილის დაბადებაზე, მსოფლიო ჩემპიონატთან დაკავშირებულ ოცნებებსა და ევროპის 2024 წლის ჩემპიონატზე კრიშტიანუ რონალდუსთან შეხვედრაზე საუბრობს.

„ხვიჩა კვარაცხელიამ 23 წლის ასაკში ბევრს მიაღწია. ქართველმა გარამარბმა თავისი ერი და კლუბი „ნაპოლი“ ახალ სიმაღლეებზე აიყვაბა. ის ახლა ოცნებობს, რომ მსოფლიო ჩემპიონატის 26-ე საკვალიფიკაციო ეტაპზე „რაღაც განსაკუთრებულს“ მიაღწიოს. კვარაცხელია, კვარადისიაკო, კვარადონა - ხვიჩა კვარაცხელიას იტალიაში გადასვლის შემდეგ ბევრი მეტსახელით მოიხსენიებენ. ბოლოს და ბოლოს, 2022 წელს „ნაპოლში“ მისვლიდან სულ რამდენიმე თვეში, მან ეს კლუბი ისტორიულ, მესამე სკუდეტოსთან მიიყვანა 33-წლიანი პაუზის შემდეგ, შემდეგ კი, ეროვნულ ნაკრებთან ერთად ევრო 2024-ის საკვალიფიკაციო ეტაპი დაძლია და ტურნირის მერვედფინალში გავიდა.ამ მიღწევებმა 23 წლის მოთამაშე აქცია როგორც კლუბის, ისე საკუთარი ქვეყნის გმირად. თუმცა, „ვინგერს“ მეტის გაკეთება სურს“, - ასე იწყებს სტატიას ჟურნალისტი.

როგორც სტატიაშია აღნიშნული, ხვიჩა კვარაცხელიამ FIFA-სთან ისაუბრა იმაზე, თუ როგორ ოცნებობს საქართველოს მსოფლიო ასპარეზზე გასვლაზე, „ნაპოლის“ ევროპულ აღიარებაზე, აგრეთვე, მან ისაუბრა ანტონიო კონტესთან მუშაობასა და ახალბედა მამის სტატუსზე.

ინტერვიუს სრულად გთავაზობთ:

FIFA: ხვიჩა, ახლახან მამა გახდი, როგორი განცდაა ეს?

„ჩემი ცხოვრება სრულებით შეიცვალა! უცებ, მამობის უდიდესი პასუხისმგებლობა ვიგრძენი. ჩემი ვაჟის დაბადებამ ენით აღუწერელი ბედნიერება მომიტანა და ახლა, ყველაფერს სხვა თვალით ვუყურებ. ყოველ დღე, ბედნიერი ვიღვიძებ და იმედი მაქვს, ყველას ექნება საშუალება, ასეთი ბედნიერება გამოცადოს“.

FIFA: ცოტა ხნის წინ, „ბოლონიას“ კარში გატანილი გოლი შვილს მიუძღვენით. როგორ შეგცვალათ მამობამ, როგორც ფეხბურთელი?

„უეცრად, კიდევ უფრო მეტად მოტივირებული გავხდი. კიდევ უფრო მეტ შრომას დებ შენს საქმეში, რადგან იცი, ყველაფერი, რასაც აკეთებ, შენი შვილისთვისაა. ვიცი, რომ როდესაც ჩემი ვაჟი გაიზრდება, ამ ყველაფერს ნახავს. ეს ისე მაბედნიერებს, რომ სიტყვებით ვერ გადმოვცემ. ეს ემოციები მაძლიერებს. ვცდილობ, ეს შეგრძნებები მოედანზე გადავიტანო და ამიტომაცაა, რომ ჩემს გოლებს მას ვუძღვნი - როდესაც გაიზრდება, რომ ნახოს. იმედი მაქვს, მომავალში, ისიც ფეხბურთელი გამოვა“.