იაგო ხვიჩია: ვადის ამოწურვის შემდეგ სალომე ზურაბიშვილს რომ ეძახი ლეგიტიმური პრეზიდენტიაო, თუ ლეგიტიმურია შეიწყალოს სააკაშვილი

„ჩემი აზრით, სალომე ზურაბიშვილის მიზანი ის არის, რომ ოპოზიციისგან არასოდეს არაფერი არ გამოვიდეს,“ - ამის შესახებ „გირჩის“ ერთ-ერთმა ლიდერმა, იაგო ხვიჩიამ პირველი არხის ეთერში გადაცემა „აქტუალური თემა“ საუბრისას განაცხადა.

როგორც ხვიჩიამ ყოფილ პრეზიდენტზე საუბრისას აღნიშნა, სალომე ზურაბიშვილის მიზანი ის არის, რომ ოპოზიციისგან არასოდეს არაფერი არ გამოვიდეს.

„მე ის მიკვირს იმედი რომ ჰქონდათ სალომე ზურაბიშვილის. ჩემთვის არ გაუცრუებია იმედი, რადგან არ მქონდა იმედი. „ნაცებს“ როგორ შეიძლება ზურაბიშვილის იმედი ჰქონოდათ, გარდა ერთადერთი შანსისა, რომ მიშა სააკაშვილს ჰქონდა იმედი და ასე ვთქვათ, სალომე ზურაბიშვილს ინდობდა. ვადის ამოწურვის შემდეგ სალომე ზურაბიშვილს რომ ეძახი ლეგიტიმური პრეზიდენტიაო, თუ ლეგიტიმურია შეიწყალოს სააკაშვილი. რატომ არ იწყალებს?

რასაც ხელს კიდებს ქალბატონი სალომე ზურაბიშვილი არის იმისთვის, რომ რამე არ გაკეთდეს. ჩემი აზრით სალომე ზურაბიშვილის მიზანი ის არის, რომ ოპოზიციისგან არასოდეს არაფერი არ გამოვიდეს და ზოგადად არიოს სიტუაცია“, - აცხადებს ხვიჩია.

ამასთან, მიმდინარე პოლიტიკურ პროცესებზე საუბრისას, ხვიჩიამ თქვა, რომ ოპოზიციურ სპექტრში „უიდეობის ერთობა იყო“.

„გეტყვით რისი ერთობა იყო ჩვენს მიღმა ოპოზიციურ სპექტრში - ეს იყო უიდეობის ერთობა. მათ აერთიანებდათ უიდეობა. იდეა საერთოდ არ არსებობს. მთელი პრობლემა ამაში მდგომარეობს“, - დასძინა ხვიჩიამ.