დიმიტრი ხუნდაძე: მნიშვნელოვანია ის საკანონმდებლო ცვლილებები, რაც მივიღეთ, მაგრამ კიდევ მნიშვნელოვანი ნაბიჯები გვაქვს გადასადგმელი, ვინაიდან ნარკოპოლიტიკა ეხება არა მხოლოდ ნარკოტიკების მომხმარებლებს, არამედ მთელ საზოგადოებას

პარტია „ხალხის ძალის“ საპარლამენტო ჯგუფის ხელმძღვანელი დიმიტრი ხუნდაძე, პლენარულ სხდომაზე, ნარკოპოლიტიკის გამკაცრების საკითხს გამოეხმაურა.

„თუ ჩვენ არ ვაწარმოეთ მძლავრი (შესაძლოა აგრესიულიც კი), ანტინარკოტიკული პროპაგანდა, მხოლოდ პრევენცია საკმარისი არ იქნება“- აღნიშნა დეპუტატმა და განმარტა, რომ აუცილებელია საუბარი ნარკოტიკების უსარგებლობაზე. მისი თქმით, ტერმინი მსუბუქი და მძიმე ნარკოტიკი მედიცინაში არ არსებობს და ისინი ნარკოტიკის პროპაგანდას ემსახურება. დიმიტრი ხუნდაძის თქმით, ხელისუფლებამ და მმართველმა გუნდა უნდა აწარმოოს აგრესიული ანტინარკოტიკული პროპაგანდა.

პარლამენტის წევრმა აღნიშნა, რომ ინიციატივა ნარკოპოლიტიკის გამკაცრებასთან დაკავშირებით კარგია, თუმცა აუცილებელია ჯანდაცვის სექტორის გააქტიურებაც, რადგან სახელმწიფომ უნდა იზრუნოს მომხმარებლებზეც.

„მსურს დავიწყო მადლობით იმიტომ, რომ ამ ცვლილებას ჩვენ დიდი ხანი ველოდით და კარგია, რომ ეს ახლა ხდება. მექნება შემოთავაზება, რომ პრევენციის მიზნით, მნიშვნელოვანი გავხადოთ მოსახლეობის ინფორმირებულობა ამ ახალ კანონპროექტთან დაკავშირებით, იმიტომ, რომ ჩვენი მიზანია ნარკომოვაჭრეებს არ მივცეთ საშუალება, ჟარგონულად ვიტყვი, „მოთესონ“ ნარკოტიკები ქვეყანაში. მაგრამ ასევე ყველა უნდა გავაფრთხილოთ პრევენციულადაც, რომ ვისაც ეყოფა ნებისყოფა და სურვილი, უარი თქვან ამ დანაშაულზე, არ გაებას ძალიან მძიმე სასჯელში. თუ ჩვენ არ ვაწარმოეთ მძლავრი (შესაძლოა აგრესიულიც კი), ანტინარკოტიკული პროპაგანდა, მხოლოდ პრევენცია საკმარისი არ იქნება.

ჩვენ ნარკოტიკების სარგებელზე კი არა, უსარგებლობაზე უნდა ვისაუბროთ და ასევე ტერმინებიდან უნდა ამოვიღოთ მსუბუქი და ძლიერი ნარკოტიკი, იმიტომ, რომ მედიცინაში ასეთი რამ არ არსებობს. მსუბუქი ნარკოტიკის ტერმინის შემოტანა, რაც კიდევ ვამბობ რეალურად არ არსებობს, არის პროპაგანდის ნაწილი. მაგალითად, ის, რომ მარიხუანა არის მსუბუქი ნარკოტიკი და მას მოაქვს სარგებელი, მაშინ როცა მისი სარგებლობა პრაქტიკულად არ არსებობს. ეს არის უმძიმესი, ძლიერი ჰალუცინოგენი და მისი მომხმარებლის ძალიან დიდი ნაწილი გადადის მძიმე ნარკოტიკზე და ძირითადად ჰეროინზე. სხვათა შორის, ძალიან ცუდი ჩვევა აქვთ მის მომხმარებლებს - ისინი მათ გარშემო ორ-სამ ადამიანს მსგავს საქმიანობაში ითრევენ.

ამიტომ ვფიქრობ, რომ პროპაგანდა არის აუცილებელი და განსაკუთრებით ახალგაზრდებისათვის. თუ ჩვენ გადავხედავთ სურათს და სტატისტიკას ზედოზირებით მოხმარების გარდაცვალების შემთხვევაში, ახალგაზრდების პრაქტიკულად მთელი უმრავლესობა არის დამწყები, ანუ გამოუცდელი ნარკომომხმარებელი და ეს ტერმინები მაგალითად, მსუბუქი ნარკოტიკი მათში შიშს არ აღძრავს. საუბარი იმაზე, რომ ვიღაცას მოუხმარია და შემდეგ კარგი სამუსიკო პიესა დაწერა ან პოემა, რა თქმა უნდა, შიშის მოხსნასთან ერთად ხდის საინტერესოს მათთვის - მოდი აბა ვცადო. ასეთ შემთხვევაში გამოცდილი ნარკომომხმარებლების გარდაცვალების შემთხვევები ნაკლებია.

მე მინდა, რომ ორივე სეგმენტში საერთოდ არ იყოს, მაგრამ გამოუცდელებში უფრო ხდება ეს, იმიტომ, რომ ასეთი საუბრები მათში იწვევს და აღვივებს ინტერესს და შიშის განცდა ქრება. ამიტომ, ძალიან გთხოვთ, ძალიან დიდი მადლობა ამ კანონპროექტისათვის, მაგრამ საჭიროა მძლავრი, აგრესიული ანტინარკოტიკული პროპაგანდა. ასევე გასააქტიურებელი იქნება ჯანდაცვის სექტორი, მათ შორის ფსიქოსოციალური რეაბილიტაციის ცენტრების საქმიანობის გააქტიურება, იმიტომ, რომ ჩვენ უნდა ვიზრუნოთ იმ მოქალაქეებზე, რომლებიც არიან ნარკოტიკების მომხმარებლები.

აქ, რა თქმა უნდა, მხოლოდ სურვილი და პროგრამების წერა არ იქნება საკმარისი. ამისთვის საჭიროა თანხები, რომელიც საკმაოდ მძიმე წონისაა ბიუჯეტისთვის, მაგრამ ეს გასაკეთებელი იქნება. ადრე ხშირად მოჰქონდათ პორტუგალიის მაგალითი. მე ვერ ვიტყოდი, რომ ეს მაგალითი მიმზიდველია და მისი სრული ასლი უნდა გადმოვიღოთ, მაგრამ შედარებისთვის ვამბობ - პორტუგალიაში ერთ მოქალაქეზე, ნარკოპოლიტიკის თვალსაზრისით, იხარჯება 40 ევრო. ჩვენთან ეს, იგივე ფორმულის გადათვლით, 4 ლარია.

ასე რომ, მნიშვნელოვანია ის, რაც მივიღეთ, მაგრამ ასევე მნიშვნელოვანია ის, რაც ჩვენ მომავალში გვაქვს გასაკეთებელი, იმიტომ, რომ ნარკოპოლიტიკა არ ეხება მხოლოდ ნარკოტიკების მომხმარებლებს. ნარკოპოლიტიკა ეხება საზოგადოების იმ უდიდეს ნაწილს, რომელიც ნარკოტიკს არ მოიხმარს,“-განაცხადა დიმიტრი ხუნდაძემ.