კახა კალაძე 9 აპრილის აქციაზე: იქ იყვნენ ის ადამიანებიც, რომლებიც მემორიალზე ასულები ცეკვავდნენ, რისი დამადასტურებელი კადრებიც არქივში არსებობს

დედაქალაქის მერის კახა კალაძის განცხადებით, 9 აპრილის მემორიალის ბლოკირება და მოქალაქეების გადაადგილების შეზღუდვა განახორციელა მარგინალურმა, რადიკალურმა დაჯგუფებამ, რომლის წარმომადგენლები საპროტესტო აქციებისას აღნიშნულ მემორიალზე ასულები ცეკვავდნენ კიდეც.

„ყველამ ვიცით, ვინ ვინ არის. ესენი არიან რადიკალური დაჯგუფების წარმომადგენლები, ვინც გამოირჩევიან აგრესიით, არიან გამარგინალებული. რა თქმა უნდა, კატეგორიულად მიუღებელია ის, რომ ადამიანებს არ მიეცათ შესაძლებლობა, მისულიყვნენ 9 აპრილის მემორიალთან და პატივი მიეგოთ დაღუპულთათვის. სხვათა შორის, იქ იყვნენ ის ადამიანებიც, რომლებიც ამ მემორიალზე ასულები ცეკვავდნენ. არსებობს ამ ფაქტის ამსახველი კადრები არქივში, მოიძიეთ და ნახავთ. ამ ადამიანებს არაფერი აინტერესებთ, რაც საქართველოსთვის მნიშვნელოვანია. ისინი მხოლოდ ასრულებენ თავიანთი პატრონების დავალებას. ყველა ვხედავთ, რომ ეს არის რადიკალური დაჯგუფება, ხოლო რადიკალებსა და მარგინალებს ამ ქვეყანაში არანაირი მომავალი არ აქვთ“, - განაცხადა კახა კალაძემ მედიასთან საუბრისას.

ჟურნალისტის შეკითხვაზე, თუ რატომ იყო პრემიერ-მინისტრის მიერ გამოქვეყნებულ პოსტში საბჭოთა არმია მოხსენებული როგორც უცხოური ძალა, დედაქალაქის მერმა აღნიშნა, რომ საბჭოთა არმია იყო უცხო ძალა, რომელმაც საქართველოს უბედურება დაატეხა თავს.

„ის უბედურება, რაც ჩვენ დაგვატყდა თავს 36 წლის წინ, უცხოური ძალის მიერ იყო მოწყობილი. აბა ვინ იყო საბჭოთა არმია, თუ არა უცხოური ძალა? საბჭოთა არმია როგორ იქნებოდა ქართული? ის, რაც მოხდა, იყო უმძიმესი, მივიღეთ კატასტროფული ვითარება, დაიღუპა უამრავი ადამიანი, თუმცა უნდა აღვნიშნოთ, რომ ეს იყო ბრძოლა თავისუფლებისთვის, დამოუკიდებლობისთვის“, - აღნიშნა კახა კალაძემ.

მისი თქმით, უცხოურ ძალას საქართველოსთან მიმართებით ყოველთვის ჰქონდა თავისი ინტერესები.

„არ იფიქროთ, რომ საქართველოში ქართველის გასაკეთებელს ევროპელი, ან ამერიკელი გააკეთებს. ბევრი რამ კეთილი საქმეებით იფუთებოდა, მაგრამ ამის უკან იყო სახელმწიფო გადატრიალებების მცდელობა, საზოგადოების გახლეჩა და დაპირისპირება, ექსტრემისტული ორგანიზაციების დაფინანსება, რაც ბოლო წლებში ძალიან კარგად გამოაშკარავდა“, – განაცხადა თბილისის მერმა.