,,პროტესტის მონაწილეთა რიგებში დგანან ოპოზიციონერები, რომლებსაც არეულობის მოწყობის დიდი გამოცდილება აქვთ“ - არჩილ თალაკვაძე

„ჯერჯერობით ერთი ერთში სრულდება ხელისუფლების პროგნოზები. რასაც ჩვენ ვეუბნებით საზოგადოებას, არის გულწრფელი და ყველა ეს პროგნოზი გამართლდა“, - ამის შესახებ არჩილ თალაკვაძემ გადაცემაში „იმედი LIVE“ განაცხადა.

„ჩვენ ვამბობდით, რომ ლობისტებმა, პატრონებმა „ნაციონალურ მოძრაობაზე“ ჩაიქნიეს ხელი, უთხრეს, რომ ისინი უკანა რიგებში უნდა გადაიმალონ. ზუსტად ასე მოხდა. „ნაციონალური მოძრაობა“ გადამალეს უკანა რიგებში, დაშალეს, ამ პატარა ნაშალებით შექმნეს პოლიტიკური ჯგუფები და მათ შეუქმნეს პარალელური „ენჯეოები“. თუ რამე აზიანებს დღეს სამოქალაქო საზოგადოებას, ეს არის „ენჯეოების“ პოლიტიზება და დესტაბილიზაციის პროცესში პირდაპირი ჩართვა. ვინ არიან, ეს ფონდები, რა თანხებით ფინანსდება ეს მარგინალური ჯგუფები - ზუსტად ამას ეხება ეს კანონი გამჭვირვალობის შესახებ.

წინა დღეებში ვთქვით, რომ ეს აქციები, რომლებსაც ჯერჯერობით მშვიდობიანი ფორმა ჰქონდა, რეალურად გადაიზრდებოდა აუცილებლად ძალადობაში. ასეც მოხდა, იმიტომ რომ ამის უკან და ამ პროტესტის მონაწილეთა რიგებში დგანან ოპოზიციონერები, რომლებსაც არეულობისა და დესტაბილიზაციის მოწყობისა დიდი გამოცდილება აქვთ. არც დააყოვნეს. დღეს პირდაპირ გააკეთეს ბრიფინგი და თქვეს: „ჩვენ ვართ ამ მიტინგის წარმმართველები“ და პირდაპირ აიღეს პასუხისმგებლობა“, - განაცხადა თალაკვაძემ.