სასამართლომ სრულად გაიზიარა ბრალდების მხარის მტკიცებულებები - ხაზარაძე-ჯაფარიძე-წერეთლის საქმის პროკურორი

ხაზარაძე-ჯაფარიძე-წერეთლის საქმის პროკურორი აცხადებს, რომ სასამართლომ სრულად გაიზიარა ბრალდების მხარის მტკიცებულებები. არჩილ ტყეშელაშვილის თქმით, სამივე ბრალდებული ცნობილი იქნა დამნაშავედ. პროკურორის თქმით, მტკიცებულებები ბრალდებულების წინააღმდეგ საკმარისი იყო, რაც მოსამართლის გადაწყვეტილებიდანაც გამოჩნდა.

„ჩვენი მტკიცებულებები რომ საკმარისი იყო, ბრალდებულების გამტყუნებისთვის, ეს დადასტურდა, ვინაიდან სასამართლომ გამოიტანა გამამტყუნებელი განაჩენი და სამივე ბრალდებული საკმაოდ მძიმე დანაშაულში იქნა ცნობილი დამნაშავედ. კიდევ ერთხელ განგიმარტავთ, სასამართლომ განსხვავებული შეფასება მისცა ჩვენს კვალიფიკაციას და გადაწყვეტილება მხოლოდ შეცვალა კვალიფიკაციის ნაწილში. ჩვენ ჯერ ბუნებრივია არ მიგვიღია სასამართლოს დასაბუთებული გადაწყვეტილება, ძალიან მოკლე განმარტება მოვისმინეთ გადაწყვეტილების ნაწილში, შესაბამისად რომ მივიღებთ დასაბუთებულ გადაწყვეტილებას, სამართლებრივ ნიუანსებს გავეცნობით, ამის შემდეგ მივიღებთ გადაწყვეტილებას გასაჩივრების ნაწილში. ბრალდების მხარეს მიგვაჩნია, რომ მტკიცებულებები, რომლებიც წარმოდგენილი იყო ადასტურებდა ბრალდებულების ბრალეულობას და კიდევ ერთხელ გეუბნებით, დადასტურდა ეს. სასამართლომ გამოიტანა გამამტყუნებელი განაჩენი. სამივე ბრალდებული ცნობილი იქნა დამნაშავედ. მტკიცებულებები, რაც გვქონდა წარდგენილი, აბსოლუტურად ყველა მტკიცებულება გაიზიარა სასამართლომ“, – განაცხადა პროკურორმა.

საქალაქო სასამართლომ მამუკა ხაზარაძის, ბადრი ჯაფარიძისა და ავთანდილ წერეთლის საქმეზე ბრალდებები გადააკვალიფიცირა, თუმცა ისინი დამნაშავედ ცნო, ხანდაზმულობის გამო კი, გათავისუფლდნენ საპატიმრო სასჯელისგან.

ამავე თემაზე:

🔵სასამართლომ მამუკა ხაზარაძე, ბადრი ჯაფარიძე და ავთანდილ წერეთელი დამნაშავედ ცნო, თუმცა, დანაშაულის ხანდაზმულობის გამო არ დააპატიმრებენ

🔵მამუკა ხაზარაძე, ბადრი ჯაფარიძე და ავთანდილ წერეთელი სასამართლოს გადაწყვეტილებას გაასაჩივრებენ

🔵ვეღარ გაბედეს დაჭერა ბიჭებმა - ინგა გრიგოლია