თეა წულუკიანი 2003-2012 წლებზე: მაშინ, პატიმარი იყო ყველა, ვინც გაბედავდა რეჟიმთან დაპირისპირებას

ჩვენ ახლა ვახერხებთ იმას, ვინც არ იცის, ან თავს გვაჩვენებს, რომ თითქოს არ იცის, ან ძნელი მოსასმენია და მაინც ნოსტალგია აწუხებთ ბაჩო ახალაიასი, ჭაკუასი და ხათუნა კალმახელიძის, ვაჩვენოთ, რა დღეში იყო მაშინ პატიმარი, - განაცხადა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებით საგამოძიებო კომისიის“ ხელმძღვანელმა, პარლამენტის ვიცე-სპიკერმა თეა წულუკიანმა გადაცემაში „იმედი LIVE“.

„მაშინ, პატიმარი იყო ყველა, ვინც გაბედავდა რეჟიმთან დაპირისპირებას, არ გადააფორმებდა ბიზნესს ან რაღაც ისეთ საქციელს ჩაიდენდა, რომელიც შეიძლება მსუბუქი მუხლით დაკვალიფიცირდეს, მაგრამ ნულოვანი ტოლერანტობის პირობებში სააკაშვილს უნდოდა ძალა ეჩვენებინა და არასრულწლოვანის მრავალი წლით ციხეში გამოკეტვასაც არ ერიდებოდა. ავჭალაში 200 ბავშვზე გათვლილი ციხეში 280 ბავშვი სტაბილურად იხდიდა სასჯელს. დღეს, იმ ავჭალის ციხეში, 50-ამდე მსჯავრდებული ბავშვია, რომლებსაც აქედან მივესალმები. ვინც ჩემი მინისტრობის დროს მაშინ იქ იყო, მათი სახელები და გვარები დღემდე მახსოვს და ვგულშემატკივრობ მათ, იმიტომ რომ ბავშვი არის ბავშვი და ყველა ბავშვმა შეიძლება ჩაიდინოს შეცდომა და სახელმწიფო იმისთვის არ არის, რომ ბავშვი ბოლომდე ჩაწიხლოს და გაანადგუროს ბავშვობაშივე“, - აღნიშნა თეა წულუკიანმა.