ვლადიმერ ბოჟაძე: დავაინიცირეთ „ფარა“, სწორედ ისეთი ფორმით, როგორიც არის წარმოდგენილი - ქვეყანას უცხოური გავლენებისგან კიდევ უფრო დავიცავთ

დავაინიცირეთ „ფარა“ სწორედ ისეთი ფორმით, როგორიც არის წარმოდგენილი, მხოლოდ თარგმანი, - ამის შესახებ საპარლამენტო უმრავლესობის წევრმა ვლადიმერ ბოჟაძემ განაცხადა.

დეპუტატის თქმით, მნიშვნელოვანია, რომ ქვეყანა კიდევ უფრო დაცული იყოს უცხოური გავლენისგან.

„იყო გარკვეული ცდომილებები საქართველოს კონსტიტუციასა და კანონმდებლობასთან, თუმცა დღეს დაიწყება განხილვები და, რა თქმა უნდა, ყველა შეუსაბამობა საქართველოს კანონმდებლობასთან სრულად აღმოიფხვრება. თუმცა, მთავარია, რომ „ფარა“ მთელი თავისი რესურსებით, რასაც ეს კანონი განსაზღვრავს, მივიღოთ და კიდევ უფრო დავიცვათ ქვეყანა უცხოური გავლენებისგან.

სამოქალაქო სექტორის გარკვეულმა ნაწილმა შეგნებულად აარიდა თავი კანონის აღსრულებას. ისინი წავიდნენ ჯარიმებზე საიმისოდ, რომ გამჭვირვალედ არ მომხდარიყო იმ ფინანსების ხარჯვა, რომელზეც ჩვენ მუდმივად ვსაუბრობდით და ახლა მით უმეტეს, როდესაც თავად ამერიკული მხარე საუბრობს USAID-ის, NED-ის გაუმჭვირვალობაზე, სავარაუდო კორუფციულ ფაქტებზე და სხვა თემებზე. რა თქმა უნდა, ახლა კიდევ უფრო მნიშვნელოვანი გახდა, რომ დავიცვათ ჩვენი ქვეყანა უცხოური გავლენებისგან “, - აღნიშნა ვლადიმერ ბოჟაძემ.

ცნობისთვის, დეპუტატები იურიდიულ საკითხთა კომიტეტის სხდომაზე უცხოურ გავლენასთან ბრძოლისთვის ამერიკული „ფარას“ ზუსტ ასლს დღეს განიხილავენ.