იტალია პატარების ვაქცინაციას იწყებს - გაიგეთ დეტალები

იტალიის წამლის სააგენტომ მიიღო გადაწყვეტილება, რომლის თანახმადაც, იტალია 5-დან 11 წლამდე ბავშვების „ფაიზერით“ ვაქცინაციას იწყებს. დღეს, საგანგებო მდგომარეობის კომისარმა ფრანჩესკო ფილიუოლომ დეტალების შესახებ ისაუბრა. უკვე ცნობილია, თუ როდის და რა ფორმით დაიწყება აღნიშნული პროცედურა.

5-დან 11 წლამდე ბავშვების ვაქცინაციას, იტალია, მიმდინარე წლის 16 დეკემბერს იწყებს. ამისათვის მილიონ-ნახევარი დოზა გამოიყოფა, რომელიც იანვარში შეივსება. ვაქცინაცია მთელი იტალიის ტერიტორიაზე ერთდროულად დაიწყება გარდა ლაციოს რეგიონისა, სადაც ბავშვების აცრას 13 დეკემბრიდან დაიწყებენ.

ბავშვებს, მოზრდილებისგან განსხვავებით, არ ექნებათ Green pass-ი. აცრა მოხდება ორჯერადად, მაგრამ მინიდოზებით (მოზრდილის დოზის მესამედი), სამკვირიანი ინტერვალით. აცრა შესაძლებელი იქნება პედიატრიულ კლინიკებში, სპეციალურად ავტორიზებულ აფთიაქებში და ვაქცინაციის უკვე არსებულ ცენტრებში, სადაც გარდა ექთნებისა იქნებიან პედიატრები, ექიმები და ყველაზე პატარებისთვის, კლოუნებიც კი.

ვიზიტის დანიშვნა ონლაინ და რეგიონებისთვის სპეციალურად გამოყოფილ სატელეფონო ნომრებზე იქნება შესაძლებელი. საკითხთან დაკავშირებით გაჩნდა არაერთი კითხვა, მაგალითად, რა შემთხვევაში არ უნდა აიცრას ბავშვი? პატარას არ აცრიან, თუ აქვს ქრონიკული ასთმური დაავადება, ან ვაქცინაში შემავალ რომელიმე ნივთიერებაზე ალერგიულია. ასევე ხშირად ისმის კითხვა, უნდა აიცრან თუ არა ის ბავშვები, რომლებმაც უკვე გადაიტანეს ვირუსი. პასუხი დადებითია, მაგრამ ჯერ კიდევ დაუდგენელია, განკურნებიდან რა პერიოდში უნდა მოხდეს ვაქცინაცია და რამდენი დოზით.

რაც შეეხება ვაქცინის შემდგომ სიმპტომებს, ისინი ბავშვებშიც ისეთივეა, როგორც მოზრდილებში, მაგრამ შედარებით მსუბუქ ფორმებში.