საიას კვლევა 5 ივლისის მოვლენებზე - ჰომოფობიური და ძალადობრივი ჯგუფის წევრებმა 53 ჟურნალისტს სცემეს

"5-6 ივლისის მოვლენების ქრონოლოგია და სამართლებრივი შეფასება", - ახალგაზრდა იურისტთა ასოციაცია კვლევას აქვეყნებს.

როგორც ორგანიზაციაში ამბობენ კვლევამ აჩვენა, რომ 2021 წლის 5 ივლისს სახელმწიფომ არ მიიღო სათანადო ზომები საზოგადოებრივი უსაფრთხოების და ჯანმრთელობის დასაცავად.

„აგრესიულმა ჯგუფებმა დაარღვიეს საზოგადოებრივი წესრიგი, ჩაიდინეს სიძულვილით მოტივირებული დანაშაულები. დაარღვიეს ლგბტ თემის წევრებისა და მათი მხარდამჭერების გამოხატვისა და შეკრების თავისუფლება, ასევე კერძო საკუთრების უფლება, უხეშად ჩაერივნენ მედიის თავისუფლებასა და ჟურნალისტურ საქმიანობაში“, - აღნიშნავს საია.

ახალგაზრდა იურისტთა ასოციაცია მიიჩნევს, რომ ხელისუფლებამ დაარღვია მისი პოზიტიური ვალდებულებები. ტოლერანტული, შემრიგებლური პოზიციის ადვოკატირების ნაცვლად, სახელმწიფოს წარმომადგენლების განცხადებებმა წაახალისა ძალადობა.

„შინაგან საქმეთა სამინისტრომ ვერ უზრუნველყო სათანადო საპოლიციო ძალების მობილიზება, ასევე ძალადობის შემთხვევებზე ეფექტიანი რეაგირება და მათი აღკვეთა“, - ნათქვამია განცხადებაში.

5 ივლისს, თბილისში, თბილისი პრაიდის კვირეულის ფარგლებში დაგეგმილი „ღირსების მარშის” ჩასაშლელად ჰომოფობიური და ძალადობრივი ჯგუფები რუსთაველის გამზირზე გამოვიდნენ. „ქართული ოცნების” საწინააღმდეგო კარვების, ასევე, “სირცხვილიას” და “თბილისი პრაიდის” ოფისების დარბევის პარალელურად, ჯგუფები განსაკუთრებული აგრესიით მედიის მიმართ გამოირჩეოდნენ.

მოძალადეებმა რუსთაველის გამზირსა და მიმდებარე ქუჩებზე 53 ჟურნალისტს სცემეს. აგრესიული ადამიანები თავს ესხმოდნენ და ფიზიკურად უსწორდებოდნენ ყველას, ვინც რაიმე ნიშნით – მიკროფონით, კამერითა თუ ფოტოაპარატით – მედიასთან ასოცირდებოდა.

ქალაქის ცენტრში, პოლიციის თანდასწრებით, ჟურნალისტებს უმოწყალოდ სცემდნენ, აგინებდნენ, აპარატურას სტაცებდნენ და უმტვრევდნენ. 

5 ივლისის ძალადობრივ აქციაზე ნაცემი ოპერატორი ლექსო ლაშქარავა, 11 ივლისს გარდაიცვალა.

ასევე საინტერესოა:

🔵 „8 ტყვიას ემსხვერპლა და დღეს 8 დეკემბერს ნიკოს სახელობის ზეთის ხილის ხე დაირგა სვეტიცხოვლის ეზოში“

🔵 მედია მაუწყებელი exclusivetv.ge-ს მიმართვა ემიგრანტებს