"კოვიდ 19-ს ახასიათებს ც რეაქტიული ცილის მომატება" - რა ინფორმაციას ავრცელებს ნანა გეგეჭკორი

აშშ-ში მოღვაწე ექიმი ნანა გეგეჭკორი კორონავირუსისთვის მახასიათებელ სიმპტომებზე წერს.

"ც რეაქტიული ცილა არ არის არც ერთი ბაქტერიული ინფექციის სპეციფიკური მარკერი.

მომატებული ც რეაქტიული ცილა, ბაქტერიული ინფექციის სხვა ნიშნების გარეშე, კატეგორიულად არ არის ანტიბიოტიკის დაწყების ჩვენება.

კოვიდ19-ის მკურნალობისთვის ანტობიოტიკი კატეგორიულად არ გამოიყენება.

კოვიდი ვირუსული დაავადებაა და ყველა ექიმმა უნდა იცოდეს, ინფექციური დაავადებების ანა ბანა, რაც გულისხმობს იმას, რომ ვირუსულ დაავადებებს ანტიბიოტიკებით არ მკურნალობენ.

კოვიდ 19-ს ახასიათებს ც რეაქტიული ცილის მომატება და ის ყოველთვის არ ნიშნავს თანდართულ ბაქტერიულ ინფექციას.

ც რეაქტიული ცილა გეუბნებათ, სადღაც არის ანთებითი პროცესი. ანთებითი პროცესის ეტიოლოგიაზე ის არანაირ ინფორმაციას არ იძლევა.

მომატებულმა ც რეაქტიულმა ცილამ უნდა დაგაფიქროთ ციტოკინური რეაქციის ალბათობაზე.

ანტიბიოტიკი სჭირდებათ მხოლოდ იმ პაციენტებს ვისაც კლინიკური და ლაბორატორიული ნიშნებით დადასტურებული, თანდართული ბაქტერიული ინფექცია აქვთ.

მართლა უხერხულია ამაზე საუბარი ვიცი, მაგრამ ისიც აუტანელია რაც ჩემს თავს ხდება.

დღეში მინიმუმ ერთ ათეულ წერილს ვიღებ ამ კონკრეტული პრობლემის ამსახველს.

ძალიან უხერხულია მართლა, რომ პაციენტების დიდი ნაწილი ამბობს, ანტიბიოტიკი მომატებული ც რეაქტიული ცილის გამო დაენიშნათ.

P.S. მაპატიეთ, პოსტის ქვეშ კითხვებს ვერ ვუპასუხებ. მორიგე ვარ და სამწუხაროდ ძალიან რთული დღე მაქვს", - წერს ნანა გეგეჭკორი.

ასევე დაგაინტერესებთ:

🔲 მარიამ ჯიშკარიანი: მიხეილ სააკაშვილს ფსიქოტროპული მედიკამენტებით მკურნალობდნენ, რაც ფასდება, როგორც ფარმაკოლოგიური წამება

🔲 ამირან გამყრელიძე: ახლა ახალი რეალობაა ომიკრონთან, "მწვანე პასპორტი" უვადო არ შეიძლება იყოს