"შობას გილოცავთ! თუმცა, ქრისტე გუშინვე გაიყინა ქუჩაში, ვერავინ იცნო" - ხატმწერი დავით ხიდაშელი, დეზერტირების ბაზართან 60 წლის მამაკაცის გარდაცვალებას ეხმაურება

ხატმწერი დავით ხიდაშელი, სოციალურ ქსელ ფეისბუკში დეზერტირების ბაზართან 60 წლის მამაკაცის გარდაცვალების ფაქტს ეხმაურება და წერს:

"შობას გილოცავთ!

თუმცა, ქრისტე გუშინვე გაიყინა ქუჩაში...

ვერავინ იცნო...სახე ჰქონდა გამურული და შავი, ნელსაცხებლების სუნი არ ასდიოდა, უფრო პირიქით...სახლი არ ჰქონდა, უსახლკარო იყო...

80 წლისას ჰგავდა, არადა სულაც არ იყო მაგდენის...

ჩვენ საშობაო საყიდლებზე დავრბოდით, არ გვეცალა  

დეზერტირების ბაზართან 60 წლის მამაკაცი გარდაიცვალა.

ადგილობრივების თქმით, იგი აფხაზეთიდან იყო დევნილი, სახლი არ ჰქონდა, ქირის გადახდის საშუალებაც არ გააჩნდა.

საგულისხმოა ის ფაქტი, რომ როგორც ადამიანები ჰყვებიან, როცა მიწაზე დავარდნილი მამაკაცი იპოვეს, სასწრაფოს დაურეკეს, თუმცა, მან ერთ საათში უკან მიაბრუნა მამაკაცი და ღია ცის ქვეშ დაყოვა.

ბაზარში მომუშავე ადამიანები “ტვ პირველთან” ამბობენ:

“გუშინ მორიგემ დამიძახა, კაცი ეგდო დაბლა. ავიყვანე, სასწრაფოს დავურეკე. წაიყვანა სასწრაფომ და ერთი საათის უკან მომიყვანა, არავინ მიიღოო, მომიგდო “კაჩკაზე” და ხელში მომიკვდა.”

“უკან გამოუგდია საავადმყოფოს, რწყილები აქვსო და ისევ აქ მოუყვანია. გაიყინებოდა, შვილო, აბა რა იქნებოდა? კლინიკაში რომ წაიყვანეს, აქეთ რატომ წამოიყვანეს? ესაა ადამიანის შველა?”

“აქ ეძინა ხოლმე, ღამე… სახელმწიფომ მიატოვა…”

“მთავრობა სად არის? ეხმარება ვინმეს? ჩვენც იგივე დაგვემართება…”

ჯანდაცვის სამინისტროს ამ ეტაპზე არ გაუკეთებია განმარტებას, რატომ არ გაეწია სამედიცინო დახმარება მოქალაქეს", - წერს ხიდაშელი.

მსგავსი სიახლეები:

🔳 დეზერტირების ბაზარში მამაკაცი ურიკაზე გაყინული იპოვეს - უბედური შემთხვევა თბილისში

🔳 ელენე ხოშტარია: ნაწამები ბავშვები, გაყინული უსახლკარო კაცი და უამრავი კოვიდით გარდაცვლილი - ასე ვხვდებით ახალ წელს