აშშ-მა პოლონეთის აეროპორტიდან ჯარები გაიყვანა, თუმცა ისინი ქვეყანაში რჩებიან - პოლონეთის თავდაცვის მინისტრი

აშშ-ის ჯარები პოლონეთში რჩებიან, სტრატეგიული ჟესოვ-იასიონკას აეროპორტის დატოვების მიუხედავად. ამის შესახებ ქვეყნის თავდაცვის მინისტრმა ვლადისლავ კოსინიაკ-კამიშმა განაცხადა, წერს RMF24.

„ამერიკული ჯარები პოლონეთში რჩებიან. ვაშინგტონში ნატოს სამიტზე მიღებული გადაწყვეტილების შესაბამისად, იასიონკაში მისიის ხასიათი იცვლება. იასიონკაში ამერიკელი ჯარების არსებული ამოცანები სხვა მოკავშირეებს გადაეცემათ. ამერიკული ჯარები პოლონეთში რჩებიან, მაგრამ სხვა ადგილებში. ახლა იასიონკას მისიაში მონაწილეობენ ძირითადად ნორვეგიული, გერმანული, ბრიტანული, პოლონური ჯარები და სხვა მოკავშირეები“, - განაცხადა კოსინიაკ-კამიშმა.

მისივე თქმით, პოლონეთმა ამერიკელ ჯარისკაცებს მიუთითა ბაზები, სადაც მათი მიღება შეიძლებოდა. ისინი მთელი ქვეყნის მასშტაბით სხვა ბაზებზე განლაგდებიან.

პოლონეთის თავდაცვის მინისტრმა ასევე აღნიშნა, რომ გადაადგილების შესახებ გადაწყვეტილება 2024 წლის ივლისში ნატოს ერთ-ერთ სამიტზე მიიღეს. იმ დროს მოკავშირეებმა ერთობლივად გადაწყვიტეს, რომ უკრაინის ლოგისტიკური და სამხედრო მხარდაჭერის მისია უფრო ნატოს ოპერაცია იქნებოდა, ვიდრე „მსურველთა კოალიციის“ ოპერაცია.

ცნობისთვის, პოლონეთში ამერიკული ჯარების ყოფნა ნატოს უფრო ფართო სტრატეგიის ნაწილია, რომელიც მიზნად ისახავს ალიანსის აღმოსავლეთ ფლანგის გაძლიერებას და რეგიონში უსაფრთხოების უზრუნველყოფას.