ავსტრალიაში ქალმა 1 წლის შვილი განზრახ მოწამლა და ფულის გამოძალვის მიზნით, მისი ვიდეოები სოციალურ ქსელში გამოაქვეყნა

ავსტრალიის პოლიციის განცხადებით, ქალს ბრალი წაუყენეს შვილის განზრახ მოწამვლისა და ფულის გამოძალვის მიზნით, მისი ტანჯვის ამსახველი ვიდეოების ინტერნეტში გამოქვეყნებისთვის. ამის შესახებ CNN წერს.

34 წლის ქალმა სანშაინის სანაპიროდან 1 წლის გოგონას მოსაწამლად, სავარაუდოდ, რამდენიმე არაავტორიზებული რეცეპტი და მედიკამენტი სამედიცინო ნებართვის გარეშე გამოიყენა, - ნათქვამია კუინზლენდის პოლიციის განცხადებაში.

„სავარაუდოდ, ქალი სამედიცინო რჩევის უგულებელყოფით, ყველა ღონეს ხმარობდა იმისთვის, რომ მოეპოვებინა არაავტორიზებული მედიკამენტები, მათ შორის სხვა ადამიანისთვის განკუთვნილი ძველი მედიკამენტები, რომლებიც სახლში ჰქონდა“, - აღნიშნულია პოლიციის განცხადებაში.

პოლიციის მტკიცებით, ქალი, რომლის სახელიც არ საჯაროვდება, ბავშვს 2024 წლის 6 აგვისტოდან 15 ოქტომბრის ჩათვლით წამლავდა, იქამდე, ვიდრე მოზარდი საავადმყოფოში არ გადაიყვანეს და ექიმებმა თავიანთი ეჭვების შესახებ დეტექტივებს არ განუცხადეს.

„როდესაც ბავშვი განიცდიდა უზარმაზარ ტანჯვას და ტკივილს, ქალმა, სავარაუდოდ, გადაიღო და გამოაქვეყნა მისი ვიდეოები. სავარაუდოდ, კონტენტის შექმნა ბავშვის ექსპლუატაციისთვის იყო განკუთვნილი და მიზნად ისახავდა ფულის გამოძალვასა და ონლაინ გამომწერების მოზიდვას“, - აცხადებენ პოლიციაში.

უწყების ცნობითვე, 7 იანვარს არაავტორიზებულ მედიკამენტებზე ჩატარებულმა ტესტირებამ დადებითი შედეგი აჩვენა და ქალი დააკავეს. მას სასამართლომ 28 იანვრამდე პატიმრობა შეუფარდა.

პოლიციის განცხადებით, ქალს საწამლავის გამოყენებით ჯანმრთელობის განზრახ დაზიანებისთვის 5 მუხლით აქვს ბრალი წაყენებული, სამი მუხლით -  სახიფათო საშუალებებით დანაშაულის მომზადება და თითო მუხლით წამება, ბავშვის ექსპლუატაცია და თაღლითობა.