მაკრონი აცხადებს, რომ ევროპამ შეცდომა დაუშვა, როდესაც რუსეთის სრულმასშტაბიანი შეჭრის დასაწყისში უკრაინაში ჯარების გაგზავნაზე უარი თქვა

 საფრანგეთის პრეზიდენტმა ემანუელ მაკრონმაშეცდომა უწოდა ევროპელების გადაწყვეტილებას, როდესაც მათ რუსეთის სრულმასშტაბიანი შეჭრის დასაწყისში უკრაინაში ჯარების გაგზავნის შესაძლებლობა გამორიცხეს. ამის შესახებ მან პორტუგალიაში ვიზიტისას განაცხადა, იუწყება The Guardian-ი.

მაკრონმა მკაფიოდ მიანიშნა, რომ ომის დასაწყისში შეცდომა იყო იმის თქმა, რომ ევროპა არასოდეს აიღებდა ვალდებულებას „ჩექმები ადგილზე სამუდამოდ გაეგზავნა“.

„ამიტომ მოგვიწია ამ სტრატეგიული გაურკვევლობის აღდგენა“, - აღნიშნა მაკრონმა და დასძინა, რომ „ნებისმიერი ესკალაციის პროვოცირება დიდი შეცდომა იქნებოდა“.

ის არ ეთანხმება მტკიცებას, რომ ევროპის სტრატეგიამ არ გაამართლა, „განსაკუთრებით რუსეთის რამდენიმე სტრატეგიული მარცხის შემდეგ, როდესაც შვედეთი და ფინეთი ნატოს შეუერთდნენ“.

„სწორედ ამიტომ უნდა გავუწიოთ წინააღმდეგობა. ამიტომ უნდა დავეხმაროთ უკრაინელებს, რომ საუკეთესო მდგომარეობაში აღმოჩნდნენ იმისთვის, რომ მოლაპარაკება მყარი და გრძელვადიანი მშვიდობის შესახებ აწარმოონ“, - განაცხადა საფრანგეთის პრეზიდენტმა.

ამავე დროს, მაკრონმა აღნიშნა, რომ სამშვიდობო შეთანხმების მიღწევის შემთხვევაში, ევროპას მოუწევს გრძელვადიანი უსაფრთხოების კონკრეტული გარანტიების მიწოდება. ამ კონტექსტში, მან ხაზი გაუსვა საფრანგეთისა და დიდი ბრიტანეთის მიერ გაწეულ მუშაობას „ძალიან კონკრეტული გადაწყვეტილებების მიღებაზე ადგილზე უსაფრთხოების მხარდასაჭერად და უზრუნველსაყოფად“. ორივე ქვეყანამ მიანიშნა უკრაინაში სამშვიდობო ძალების პოტენციურ განლაგებაზე.

მაკრონის თქმით, ეს საკითხები კვლავ განიხილება 2 მარტს ლონდონში გამართულ სამიტზე, სადაც შეიკრიბებიან იმ ქვეყნების წარმომადგენლები, რომლებმაც ამ თვის დასაწყისში უკრაინის თაობაზე პარიზში გამართულ საგანგებო სამიტში მიიღეს მონაწილეობა.