ნეთანიაჰუ: ისრაელი იტოვებს უფლებას, საჭიროების შემთხვევაში, ბრძოლა განაახლოს

 ისრაელის პრემიერ-მინისტრმა ბენიამინ ნეთანიაჰუმ მძევლების გათავისუფლების შესახებ შეთანხმების პირველ ეტაპს „დროებითი ცეცხლის შეწყვეტას“ უწოდა.

შეთანხმების ძალაში შესვლიდან რამდენიმე საათით ადრე ნეთანიაჰუ სიტყვით გამოვიდა და განაცხადა, რომ აშშ-ის არჩეულმა პრეზიდენტმა დონალდ ტრამპმა და მოქმედმა პრეზიდენტმა ჯო ბაიდენმა ხაზგასმით აღნიშნეს, რომ ისრაელს შეუძლია, ღაზაში საომარ მოქმედებებს დაუბრუნდეს, თუ შეთანხმების შემდეგი ეტაპები არ განხორციელდება.

„ისრაელი არ მოისვენებს, ვიდრე ომის ყველა მიზანს არ მიაღწევს, რაც მოიცავს ღაზაში მყოფი თითოეული მძევლის დაბრუნებას“, - განაცხადა მან.

პრემიერ-მინისტრის თქმით, აშშ-მა პირობა დადო, რომ ისრაელს ექნება იარაღი, რომელიც, საჭიროების შემთხვევაში, ბრძოლაში დასაბრუნებლად დასჭირდება და ამას გააკეთებს „ახალი გზებით და ძალიან დიდი ძალით“.

ამასთან, ნეთანიაჰუმ აღნიშნა, რომ ცეცხლის შეწყვეტის შესახებ აშშ-ისა და კატარის შუამავლობით გამართულ მოლაპარაკებებში ისრაელი სამ საკითხთან დაკავშირებით მტკიცედ იდგა - პირველი, მისი თქმით, ისრაელი ინარჩუნებს უფლებას, საჭიროების შემთხვევაში, დაუბრუნდეს ბრძოლას აშშ-ის მხარდაჭერით; მეორე, მან მოითხოვა გარიგების პირველ ეტაპზე გასათავისუფლებელი ცოცხალი მძევლების რაოდენობის მნიშვნელოვანი გაზრდა და მესამე, ისრაელი დაჟინებით მოითხოვდა ფილადელფის დერეფანში, ღაზა-ეგვიპტის საზღვრის გასწვრივ, თავისი ჯარების შენარჩუნებას.

ნეთანიაჰუს თქმით, ისრაელი ფილადელფის დერეფანში ჯარების რაოდენობას არ შეამცირებს, არამედ პირველ ეტაპზე მათ რაოდენობას გაზრდის, რაც ეწინააღმდეგება შეთანხმების პირობებს, სადაც ნათქვამია, რომ ისრაელი „პირველ ეტაპზე ეტაპობრივად შეამცირებს ძალებს დერეფნის ტერიტორიაზე“.