უკრაინის გენშტაბი ადასტურებს, რომ უკრაინულმა ჯარებმა ქალაქი სუჯა დატოვეს

უკრაინის თავდაცვის ძალებმა კურსკის ოლქის ქალაქი სუჯა დატოვეს, რათა უფრო ხელსაყრელი პოზიციები დაიკავონ. ამის შესახებ უკრაინის შეიარაღებული ძალების გენერალური შტაბის ანგარიშშია ნათქვამი.

უკრაინის გენშტაბმა გაასაჯაროვა რუკა, სადაც ნაჩვენებია, რომ უკრაინის ჯარები რუსეთის ქალაქ სუჯადან სრულად გავიდნენ და ქალაქი რუსეთის კონტროლის ქვეშ იმყოფება.

ამავდროულად, მტერი არ თმობს უკრაინის ჯარების პოზიციების დაკავების მცდელობებს. 15 მარტს კურსკის მიმართულებით 17 შეიარაღებული შეტაკება მოხდა.

როგორც უკრაინული მედია მანამდე იუწყებოდა, სამხედრო ანალიტიკოსებმა, რომლებიც საბრძოლო მოქმედებების რუკებს ავრცელებენ, რუსეთის მიერ ქალაქ სუჯას აღების შესახებ 12 მარტს დაწერეს.

ამასთან, 12 მარტს უკრაინულმა მონიტორინგის პროექტმა DeepState-მა განაახლა ფრონტის ხაზის რუკა, სადაც ნაჩვენები იყო, რომ სუჯა უკრაინის თავდაცვის ძალების კონტროლის ქვეშ აღარ იმყოფებოდა.

რუსეთ-უკრაინის ომის ვეტერანის, უკრაინის შეიარაღებული ძალების სარეზერვო მაიორის, ოლექსი გეტმანის თქმით, უკრაინის თავდაცვის ძალების გაყვანა კურსკის ოლქის ქალაქ სუჯადან შესაძლოა, ამერიკის შეერთებული შტატების ერთ-ერთი მოთხოვნა იყოს, რაც იმას ნიშნავს, რომ ეს კარგად გააზრებული ტაქტიკის ნაწილია.