"დეტალურად აღწერდა, როგორ მოკლა ჯერ მამა, მერე დედა" - მოწმის ჩვენება მშობლების მკვლელობაში ბრალდებულის საქმეში

მშობლების მკვლელობასა და დაწვაში ბრალდებული კაცი ბრალს არ აღიარებს. გიორგი ბეროზაშვილი დღეს სასამართლო პროცესზე ოპერატიული ღონისძიებით მოპოვებულ ვიდეომასალას, სადაც ის ჩადენილი დანაშაულის შესახებ დეტალურად ყვება, დუმილით უყურებდა.

ვაზისუბანში მომხდარი სასტიკი მკვლელობის  საქმეზე დღეს პოლიციის ის მაღალჩინოსანიც გამოკითხეს, რომელმაც აღნიშნულ ვიდეომასალაში ბრალდებულს ესაუბრება.

კახა მურადაშვილმა სასამართლო პროცესზე  ორდღიანი საგამოძიებო მოქმედებები დეტალურად გაიხსენა და დაადასტურა, რომ მძიმე დანაშაულში მხილებულმა კაცმა ჩვენების მიცემის დროს  მასთან ბრალი აღიარა.

"აღიარა დანაშაული. დეტალურად აღწერდა როგორ მოკლა ჯერ მამა, როგორ დედა, შემდეგ როგორ წაუკიდა ცეცხლი და შემდეგ როგორ ცდილობდა ამ ყველაფრის დაფარვას, რაღაც ალიბების შექმნას. დეტალები, ყველაფერი შეიძლება არ მახსოვდეს და ჩანაწერი განხორციელდა და გექნებათ საშუალება, რომ ნახოთ, - თქვა პროცესზე მურადაშვილმა. 
საზარელი მკვლელობის საქმეზე მომდევნო სასამართლო პროცესი 10 ნოემბერს ჩაინიშნა.

გიორგი ბეროზაშვილმა საკუთარ დედ-მამას ჯერ ცეცხლსასროლი იარაღიდან ესროლა, შემდეგ კი  კვალის დაფარვის მიზნით საცხოვრებელ ბინაში ცეცხლი გააჩინა და ყაჩაღობის ინსცენირება მოაწყო.

ბრალდებულს წინასწარი პატიმრობა შეეფარდა. ის კრიმინალური პოლიციის ყოფილი თანამშრომელია.

ბრალის დამტკიცების შემთხვევაში გიორგი ბეროზაშვილს უვადო პატიმრობა ემუქრება. 

ასევე დაგაინტერესებთ:

🔵საფრანგეთში კბილის ჯაგრისების ქურდობის ბრალდებით ორი ქართველი დააკავეს

🔵"მთელი ვარჯიშის განმავლობაში ხვიჩა ცუდ ხასიათზე იყო, ნერვიულობდა და მომხდარზე ფიქრობდა" - რა ხდებოდა ვარჯიშზე მანქანის მოპარვის შემდეგ?