კაცს, რომელმაც ბავშვები ხილის უნებართვოდ მოკრეფის გამო, პლასტმასის მილით სცემა, სასამართლომ 5 წლით პატიმრობა და 2000 ლარის ჯარიმა შეუფარდა

კაცს, რომელმაც არასრულწლოვნებს ხილის უნებართვოდ მოკრეფის გამო, პლასტმასის მილით ფიზიკური დაზიანება მიაყენა, გორის რაიონულმა სასამართლომ 5 წლით თავისუფლების აღკვეთა და 2000 ლარის ჯარიმა შეუფარდა.

ბავშვების ინტერესებს სასამართლოში PHR იცავდა.

„ბავშვზე ფიზიკური ძალადობა თავისუფლების აღკვეთით დაისაჯა.

დღეს გორის რაიონულმა სასამართლომ (მოსამართლე დავით მაკარაძე) ბავშვის ფიზიკური დასჯის საქმეზე გამამტყუნებელი განაჩენი გამოიტანა და ბავშვზე მოძალადეს 5 წლით თავისუფლების აღკვეთა და 2000 ლარის ოდენობით ჯარიმა შეუფარდა.

პარტნიორობა ადამიანის უფლებებისთვის (PHR), აღნიშნულ საქმეს USAID Rule of Law Program I USAID სამართლის უზენაესობის პროგრამა მხარდაჭერით აწარმოებს.

ერთ დღეს, გიორგიმ ხილი უნებართვოდ მოკრიფა. ამის გამო კი ხილის ერთ-ერთმა მეპატრონემ ბავშვს პლასტმასის მილით ფიზიკური დაზიანება მიაყენა ფეხზე, ხოლო მეორემ, ბავშვი ხიდან ძალით ჩამოათრია, რამდენჯერმე გაარტყა სახეში ხელი, ამოარტყა პანღური, მიაყენა სიტყვიერი შეურაცხყოფა, ძალის გამოყენებით წელზემოთ გააშიშვლა, აიძულა შარვლის გახდა და ამ მდგომარეობაში ბავშვი ქუჩაში გაუშვა. მოზარდს სხეულზე ფიზიკური დაზიანების კვალი აღენიშნებოდა.

დღეს, ძალადობის ფაქტიდან წელიწად-ნახევრის შემდეგ, გორის რაიონულმა სასამართლომ დამნაშავედ ცნო პირი, რომელმაც გიორგი დასაჯა და ღირსება შეულახა“, - წერია გავრცელებულ ინფორმაციაში.