ლევან მაჭავარიანი: უამრავი მაგალითი შეგვიძლია მოვიყვანოთ, როგორ ახალისებს დიპლომატიური კორპუსი საქართველოში რადიკალიზმს

„უამრავი მაგალითი შეგვიძლია მოვიყვანოთ, როგორ ახალისებს დიპლომატიური კორპუსი საქართველოში რადიკალიზმს“, - ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა განაცხადა, რითაც გამოეხმაურა გერმანიის და საფრანგეთის ელჩების შეხვედრას საპროტესტო წარწერების და მოწოდებების ფონზე.

მისი თქმით, ღიად მოუწოდებდნენ საზოგადოებას, რომ მივარდნოდნენ პოლიტიკოსებს.

„სამწუხაროდ, არამარტო ეს, უამრავი მაგალითი შეგვიძლია მოვიყვანოთ როგორ ახალისებს დიპლომატიური კორპუსი საქართველოში რადიკალიზმს. მაგალითისთვის შეგვიძლია გავიხსენოთ იმ „ენჯეოების“ კამპანიები, რომელიც პირდაპირ ევროპული ფულით ფინანსდება: „84 ტყვია კეფაში“, „მოვკლათ ქოცები“, „ჩავუფურთხოთ ქოცებს“ და ა.შ. აქვეყნებდნენ ჩვენს მონაცემებს და ღიად მოუწოდებდნენ საზოგადოებას, რომ მივარდნოდნენ პოლიტიკოსებს, მათ შვილებს, შვილიშვილებს და დააბულინგონ.

ქალბატონი სალომე ზურაბიშვილის განცხადება, რომ პოლიტიკა სკოლაში შევიტანოთ, ბატონი ვაშაძის ამორალური და ამაზრზენი განცხადება, რომ ბავშვებო, არ მიესალმოთ თქვენს მშობლებს, თუ ისინი „ქართული ოცნების“ მხარდამჭერები არიანო - ამაზე რომ დუმილი იყო მუდმივად დიპლომატიური კორპუსის მხრიდან, ეს ხომ პირდაპირ წახალისებაა ასეთი ტიპის ქმედებების“, - აღნიშნავს მაჭავარიანი.