რის გაკეთება შეიძლება “პერმესოს რიჩევუტით” იტალიაში

ვისაც იტალიურ ბიუროკრატიასა და საბუთებთან შეხება ჰქონია, ყველა დაგიდასტურებთ, თუ რამდენ სირთულესთან არის დაკავშირებული თითოეული ნაბიჯი და რამდენად არის დროში გაწელილი თითოეული პროცედურა. 

ეს განსაკუთრებით საემიგრაციო სამსახურებს ეხება. ხშირად ხდება ისე, რომ პირის დროებითი ბინადრობის ნებართვას, რომელსაც იტალიური Permesso di soggiorno-ს ასაღებად აქვს განცხადება შეტანილი, იქამდე გასდის ვადა, ვიდრე ქვესტურიდან საბუთს გამოიტანს და უწევს მხოლოდ "პერმესოს რიჩევუტით", იგივე ქვითრით გადაადგილება. 

პირადად გამოსცადეს აღნიშნული ბიუროკრატიული ლაბირინთის სირთულე იმ უცხოელებმა, რომლებმაც Sanatoria-ს ფარგლებში "პერმესოს" ასაღებად გააკეთეს განაცხადი.

განაცხადების მიღება მოხდა 2020 წლის ზაფხულში და დღემდე ამ ადამიანების უმრავლესობა, ისევ ელოდება კუთვნილ "პერმესოს". შესაბამისად, საკმაოდ ხანგრძლივი პერიოდის განმავლობაში  "რიჩევუტით" მოქმედება უწევთ.

მოდით, ვნახოთ, რის გაკეთება შეიძლება ბინადრობის ნებართვის ქვითრით:

• აღნიშნული საბუთით შესაძლებელია ყველა ის აქტივობა, რაც ბინადრობის ნებართვის ქონის შემთხვევაში შეიძლება გააკეთოს პირმა:
• ბინის ქირის კონტრაქტის გაფორმება
• სამუშაო ხელშეკრულების გაფორმება
• მისამართზე ჩაწერა
• სამედიცინო მომსახურების მიღება
• უნივერსიტეტში, ან სხვა საგანმანათლებლო კურსებზე ჩაწერა

კიდევ ერთი ყველაზე ხშირად დასმული კითხვაა - შესაძლებელია თუ არა, "რიჩევუტით" მგზავრობა?

უცხო ქვეყნის მოქალაქეს "რიჩევუტით" იტალიის ტერიტორიის დატოვება შეუძლია თუ ის ფლობს:

• ფოსტის მიერ გაცემულ ქვითარს (ანუ, ქვესტურის მიერ გაცემული არ გამოდგება)
• აქვს ვადაგასული ბინადრობის ნებართვა
• აქვს პასპორტი მოქმედების ვადით

სხვა შემთხვევაში, ბინადრობის ნებართვის ქვითრით მოგზაურობა არ შეიძლება და პირი აუცილებლად უნდა დაელოდოს როდის დამზადდება მისი საბუთი.

ნინა მამუკაძე 

ფლორენცია, იტალია