"არ მაინტერესებს არასამთავრობო ორგანიზაციების განცხადებები" - თეა წულუკიანი

საქართველოს კულტურის მინისტრი თეა წულუკიანი არასამთავრობო ორგანიზაციების წარმომადგენლების ერთობლივი განცხადებას გამოეხმაურა.

საუბარია 21 არასამთავრობო ორგანიზაციის განცხადებაზე, სადაც აღნიშნულია, რომ დასავლელ პარტნიორებზე მმართველი პარტიის თავდასხმები შემაშფოთებელი ტენდენციის სახეს იღებს.

"არ მაინტერესებს არასამთავრობო ორგანიზაციების განცხადებები, თუ ეს არ მეხმარება მუშაობაში და იმაში, რომ ვიმუშაო უკეთესად, კიდევ უფრო უკეთესად.

მე მაქვს ის პოზიცია, რაც ნებისმიერ ქართველს ამ ქვეყანაში.

საქართველო სუვერენული სახელმწიფოა, საქართველო თავისი დამოუკიდებლობა მოიპოვა, თავისი მეგობრების დახმარებით, რა თქმა უნდა, მაგრამ საკუთარი სისხლით, მათ შორის ახალგაზრდა გოგოებისა და ბიჭების.

ამ დამოუკიდებლობას მოფრთხილება სჭირდება და მუდმივად შეხსენება ყველასთვის, რომ ჩვენ ვართ ძალიან ძველი და დიდი კულტურის ერი", – განაცხადა თეა წულუკიანმა.

მანამდე, საქართველოში მოქმედმა არასამთავრობო ორგანიზაციებმა ევროპის საბჭოს წამების პრევენციის კომიტეტს ერთობლივი განცხადებით მიმართა.

საქართველოს ექსპრეზიდენტი მიხეილ სააკაშვილი 1 ოქტომბერს დააკავეს და იგი დაკავების დღიდან შიმშილობს. ის ამჟამად იმყოფება სასჯელაღსრულების სისტემის მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მაღალტექნოლოგიურ კლინიკაში, გარდა გორის სამხედრო ჰოსპიტლისა, გადაყვანის შემთხვევაში, მზად არის შიმშილობა შეწყვიტოს. გაერთიანებული ოპოზიცია კი 6 ნოემბრიდან პერმანენტულ აქციებს მართავს მიხეილ სააკაშვილის მაღალტექნოლოგიურ კლინიკაში გადაყვანის მოთხოვნით.

ამავე თემაზე:

🔲 არასამთავრობო ორგანიზაციები ევროპის საბჭოს წამების პრევენციის კომიტეტს ერთობლივი განცხადებით მიმართავს

🔲 ირაკლი კობახიძეს 21 არასამთავრობო ორგანიზაცია აკრიტიკებს