"ძალიან მძიმე სანახავია თავაწეული მკვლელი პროცესზე" - ნიკო კვარაცხელიას ოჯახი, მკვლელობაში ბრალდებულების მშობლებს მიმართავს

ვერაზე მოკლული ნიკა კვარაცხელიას ოჯახი განცხადებას ავრცელებს.

ოჯახი მკვლელობაში ბრალდებულების ალეკო ჭელიძისა და გიორგი კაველაძის მშობლებს მიმართავენ და სთხოვენ, გამოხატოთ ადამიანური პოზიცია და ჩამოაცილონ საქმეს მათ მიერ აყვანილი ადვოკატები.

"არცერთი მშობელი არ უნდა მოესწროს შვილის სიკვდილს მით უმეტეს უდანაშაულო შვილის სასტიკ მკვლელობას!

ჯერ ჩვენ უნდა მივდიოდეთ და მერე ჩვენი შვილები!

საჯარო განცხადებების კეთება არ არის ჩვენთვის სასიამოვნო პროცესი, თუმცა წარმოუდგენელი ტკივილია, როდესაც ხვდები, რომ ბრალდებულთა ადვოკატები არ ჩაუღრმავდნენ მომხდარს, აუხსნელი დანაშაულის სიმძიმეს და საკმაოდ უკადრისი ხერხებით ცდილობენ მართლმსაჯულების პროცესის სანახაობად ქცევას.

ამდენად, მივმართავთ ალეკო ჭელიძისა და გიორგი კაველაძის მშობლებს, კიდევ იმ ოჯახებს და მათ შვილებს, ვინც ჩართული იყო მკვლელების სტუმარმასპინძლობის და მკვლელობის დაგეგმვის ხელშეწყობის პროცესში - და კიდევ ერთხელ გთხოვთ - ქმედითად გამოხატოთ თქვენი ადამიანური პოზიცია და ჩამოაცილოთ საქმეს თქვენს მიერ აყვანილი ადვოკატები!

ნუ ჩაუსახავთ ცრუ იმედებს შემზარავი დანაშაულის ჩადენაში მხილებულ შვილებს.

თუ ნამდვილად გიყვართ ისინი, - მიეცით მათ საკუთარ თავთან მარტო დარჩენისა და გულწრფელი სინანულის საშუალება. ძალიან მძიმე სანახავია თავაწეული მკვლელი პროცესზე",- ნათქვამია განცხადებაში.

ნიკოლოზ კვარაცხელიას თბილისში, ნიკოლაძის ქუჩაზე, ცეცხლსასროლი იარაღიდან ესროლეს. მიყენებული ჭრილობების შედეგად, ის კლინიკაში გარდაიცვალა. შსს-მ საქმეზე ორი პირი დააკავა. როგორც ერთ-ერთი დაკავებული აკო ჭელიძე აცხადებს, მისთვის აღნიშნული მკვლელობა არავის არ დაუკვეთს, თუმცა მოტივი თუ რატომ მოკლეს ახალგაზრდა ბიჭი კვლავ უცნობია.

ამავე თემაზე:

🔲  "მე მინდა იცოდეთ, ვინ იყო ნიკო" - ნიკო კვარაცხელიას 16 წლის დის, კატო კვარაცხელიას ემოციური წერილი ძმას

🔲 "ოჯახის გადაწყვეტილებით, დააწესებენ ნიკოს სახელობის სტიპენდიას" - ნინო ზამბახიძე