ლევან მაჭავარიანი: ნორმალიზების პროცესი დაწყებულია აშშ-რუსეთს შორის, დიპლომატიური ურთიერთობის აღდგენაზე მიდის მუშაობა, სავარაუდოდ, იგივე იქნება ევროპის შემთხვევაშიც

 ფრაქცია „ქართული ოცნების“ თავმჯდომარის მოადგილე ლევან მაჭავარიანი, ნატოს გენერალური მდივნის განცხადებას გამოეხმაურა, სადაც აცხადებს, რომ უკრაინაში ომის დასრულების შემდეგ დასავლეთს შეუძლია რუსეთთან ურთიერთობის ნორმალიზება.

მაჭავარიანის თქმით, უკრაინა გამოყენებული იქნა ინსტრუმენტად პროქსი ომში, რომელიც მიმდინარეობდა დასავლეთსა და რუსეთს შორის.

ამასთან დეპუტატი ამბობს, რომ ძალიან გულდასაწყვეტია ნატოს გენმდივნის განცხადებების მოსმენა.

მისივე განცხადებით, „ქართული ოცნება“ არის სტაბილურობის და მშვიდობის გარანტი საქართველოში.

„ნორმალიზების პროცესი დაწყებული არის აშშ-სა და რუსეთს შორის. დიპლომატიური ურთიერთობის აღდგენაზე მიდის აქტიური მუშაობა, სავარაუდოდ, იგივე იქნება ევროპის შემთხვევაშიც და ძალიან გულდასაწყვეტია ამ განცხადებების მოსმენა.

ჩვენ ეს ყველაფერი კარგად გვესმოდა და ვცდილობდით, მაქსიმალური სიფრთხილით ჩვენი მოქალაქეებისთვის ეს ინფორმაცია მიგვეწოდებინა იმასთან დაკავშირებით, რომ როდესაც უკრაინაში ეს ტრაგედია დაიწყო ყველას შევახსენებ, მას ჰპირდებოდნენ დაჩქარებული წესით მიიღებდნენ ნატოში. დღეს უკვე საუბარია - გამორიცხული არის უკრაინის რაიმე სახით ნატოში გაწევრიანება.

ასევე, იმასთან დაკავშირებით არის უკვე განცხადებები აშშ-ის ადმინისტრაციის მხრიდან, რომ უკრაინა იყო გამოყენებული ინსტრუმენტად პროქსი ომში, რომელიც მიმდინარეობდა დასავლეთსა და რუსეთს შორის. ეს ჩვენთვის თავიდანვე ნათელი იყო. მანდედან გამომდინარე მოქმედებდით ასე ფრთხილად, ასე პრაგმატულად. ის ზეწოლა, რაც მომდინარეობდა, ის წნეხი, რაც მომდინარეობდა ჩვენს ხელისუფლებაზე, ზუსტად ამისთვის იყო განკუთვნილი, ჩვენც გამოვეყენებინეთ როგორც სატელიტი, მარიონეტი ქვეყანა, მაგრამ, რა თქმა უნდა, ჩვენ ეს ყველაფერი ავიცილეთ.

როგორი წნეხიც არ უნდა იყოს, ზუსტად იმავენაირად მყარად დავდგებით, ვინაიდან „ქართული ოცნება“ არის სტაბილურობის და მშვიდობის გარანტი საქართველოში“, - აღნიშნავს მმართველი გუნდის დეპუტატი.