„ვისაც გინდათ ტოლობის დასმა 7 ნოემბერსა და დღევანდელ რეალობას შორის, აშკარად, მშვიდობიანი აქციის სხვადასხვანაირი განმარტება გვაქვს... უნდა გავიაზროთ, რომ მიმდინარე აქციები არაფერ კავშირშია მშვიდობიან პროტესტთან“ - მარიამ ზაქარიაშვილი

საკრებულოს წევრი მარიამ ზაქარიაშვილი რუსთაველის გამზირზე განვითარებულ მოვლენებს ეხმაურება და იმ ადამიანებს პასუხობს, რომლებიც პარალელს ავლებენ 7 ნოემბრის დღესთან.

როგორც მარიამ ზაქარიაშვილი სოციალურ ქსელში წერს, მიმდინარე აქციები არაფერ კავშირშია მშვიდობიან პროტესტთან. მისივე თქმით, პროტესტი უნდა გამოიხატოს კანონის ფარგლებში.

„პირველ რიგში, ვგმობ ყველანაირ ძალადობას. გამოძიება მიმდინარეობს ყველა ცალკეულ შემთხვევაზე და აუცილებლად მოხდება რეაგირება. ვისაც გინდათ ტოლობის დასმა 7 ნოემბერსა და დღევანდელ რეალობას შორის, აშკარად, მშვიდობიანი აქციის სხვადასხვანაირი განმარტება გვაქვს... უნდა გავიაზროთ, რომ მიმდინარე აქციები არაფერ კავშირშია მშვიდობიან პროტესტთან. რადიკალური დაჯგუფებები პიროტექნიკით(პიროტექნიკას ზიანი არ მოაქვსო… ახალ წელს რამდენი დაზიანებული ადამიანი გვინახავს?! ზოგი საერთოდ ხელის გარეშე დარჩა) და მოლოტოვის კოქტეილებით ცეცხლს უკიდებენ, ქვებით თავს უტეხავენ და სხვადასხვა ნივთებს ესვრიან პოლიციელებს, რომლებიც ყოველდღიურად იცავენ ჩვენს უსაფრთხოებას.

სამწუხაროდ, ამ ყველაფერს ეწირებიან ის ადამიანები, ვინც გულწრფელად დგანან და სჯერათ რომ თავისი ქვეყნის ინტერესებს იცავენ. როცა ძალადობას არ ვემხრობით, მხოლოდ ერთ მხარეს არ უნდა ვგმობდეთ. ჩვენ ყველას გვაქვს პროტესტის გამოხატვის უფლება, თუმცა ეს უნდა მოხდეს კანონის ფარგლებში. საუბედუროდ, მსგავსი რადიკალიზაცია საფრთხეს უქმნის ჩვენი ქვეყნის მშვიდობიან მომავალს. ჩვენი ისტორია სავსეა ბრძოლებით, სადაც ქართველი ხალხი ყოველთვის იბრძოდა თავისუფლებისა და რწმენის შენარჩუნებისთვის, დღესაც ასეა. ქვეყნის ევროპული წინსვლა ამ ქვეყნის დღის წესრიგი და დემოკრატიული პრინციპით აბსოლუტური უმრავლესობის აზრია, მაგრამ მხოლოდ იმ პირობებში, რომ ეს ჩვენთვის ღირსეული და სამართლიანი იყოს. ჩვენი ისტორიული არჩევანი არის ჩვენი ქვეყანა და ის არ უნდა გახდეს კიდევ ერთი სამიზნე გლობალური ძალების კონფლიქტში. ჩვენთან არს ღმერთი, დიდება და მშვიდობა საქართველოს!“, - მარიამ ზაქარიაშვილი.