შამილიშვილის ვერცხლი და მიშველიძის ბრინჯაო ევროპის ჩემპიონატზე

ბულგარეთის დედაქალაქ სოფიაში დაიწყო ევროპის ჩემპიონატი ძალოსნობაში და ქართულმა დელეგაციამ პირველი მედლები მოიპოვა. 

ევროპის ჩემპიონატზე, რომელიც პარიზის 2024 წლის ოლიმპიადის სალიცენზიო ქულებსაც იძლევა, 55 კგ. წონით კატეგორიაში საქართველოს ნაკრების ორმა წევრმა იასპარეზა.

რამინ შამილიშვილმა ატაცში მთავარი მწვრთნელის, გიორგი ასანიძის ყველა მითითება შეასრულა, სამივე ცდა 106 / 109 /111 წარმატებით დაძლია საქართველოს ნაკრების 2024 წლის ყულაბას პირველი მედალი მოუტანა!
შამილიშვილმა აკვრაში დაძლეული 126 / 130 კილოგრამით მე-4 ადგილი დაიკავა, ხოლო ორჭიდში მოგროვილი 241 კილოგრამით კვლავ ვერცხლის მედალს დაეუფლა და ვიცე-ჩემპიონობა იზეიმა.

გოდერძი ბერდელიძემ კი ატაცში თავი 107 კილოგრამს გაართვა და მე-4 ადგილზე გავიდა, ძალოსანმა აკვრაში 123 კილოგრამი დაძლია და მე-8 საფეხური ერგო, ორჭიდში მოგროვილი 230 კილოგრამით კი მე-6 იყო. 

61 კგ. წონით კატეგორიაში შოთა მიშველიძემ იასპარეზა.

ქართველმა ძალოსანმა პირველ მოძრაობა-ატაცში 121 / 125 კგ. დაძლია და ბრინჯაოს მედლის მფლობელი გახდა.

მიშველიძემ აკვრაში თავი 143 / 147 კილოგრამს გაართვა და მე-4 ადგილზე გავიდა, ხოლო ორჭიდში მოგროვილი 272 კილოგრამით ევროპის ბრინჯაოს პრიზიორი გახდა.

67 კგ. წონით კატეგორიაში ფიცარნაგზე გოგა ჩხეიძე გამოვიდა. პირველ მოძრაობა-ატაცში ქართველმა ძალოსანმა  128 / 132 კგ. დაძლია და მე-9 ადგილზე გავიდა.

ჩხეიძემ აკვრაში თავი 157 კილოგრამს გაართვა და  კვლავ მე-9 ადგილი ერგო, იგივე საფეხურზე აღმოჩნდა ორჭიდში მოგროვილი 289 კილოგრამითაც.

დღეს ასპარეზობაში 73კგ წონით კატეგორიაში არჩილ მალაყმაძე ჩაერთვება.