ფონ დერ ლაიენი: სასწრაფოდ საჭიროა მტკიცე ზომები ცეცხლის შეწყვეტის მისაღწევად, ევროპა გააგრძელებს რუსეთზე ზეწოლას, ვიდრე სისხლისღვრა არ დასრულდება და მშვიდობა უკრაინის პირობებით არ მიიღწევა

უკრაინის ქალაქ სუმიზე რუსეთის სარაკეტო იერიშის შემდეგ ევროკომისიის პრეზიდენტმა ურსულა ფონ დერ ლაიენმა განაცხადა, რომ უკრაინაში ცეცხლის შეწყვეტის მისაღწევად სასწრაფოდ საჭიროა გადამწყვეტი ზომების მიღება. ამის შესახებ მან სოციალურ ქსელ X-ზე დაწერა.

ფონ დერ ლაიენმა ხაზგასმით აღნიშნა, რომ სუმიზე დარტყმა არის „საშინელი შეხსენება“ იმისა, რომ რუსეთი იყო და რჩება აგრესორად, რომელიც უხეშად არღვევს საერთაშორისო სამართალს.

„დღეს დილით რუსეთმა მორიგი სასტიკი დარტყმა განახორციელა ქალაქ სუმიზე, რის შედეგადაც კაცები, ქალები და ბავშვები დაიღუპნენ.

ბარბაროსული თავდასხმა კიდევ უფრო საზიზღარი გახდა, როდესაც ხალხი მშვიდობიანად შეიკრიბა ბზობის დღესასწაულის აღსანიშნავად...

სასწრაფოდ საჭიროა მტკიცე ზომები ცეცხლის შეწყვეტის მისაღწევად. ევროპა გააგრძელებს პარტნიორებთან დაკავშირებას და რუსეთზე ძლიერ ზეწოლას, ვიდრე სისხლისღვრა არ დასრულდება და სამართლიანი და ხანგრძლივი მშვიდობა არ მიიღწევა უკრაინის პირობებით.

დღევანდელი თავდასხმის მსხვერპლები, მათი ოჯახები და ყველა უკრაინელი ჩვენს გულებშია დღეს და ყოველდღე.

ევროპა უკრაინისა და პრეზიდენტ ვოლოდიმირ ზელენსკის გვერდით დგას“, - განაცხადა ევროკომისიის თავმჯდომარემ.