კაია კალასი: თუ აშშ და ევროკავშირი სავაჭრო ომს დაიწყებენ, ერთადერთი, ვინც ამით გახარებული იქნება, ჩინეთია

ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა აღნიშნა, რომ აშშ-სა და ევროპას შორის პოტენციური „სავაჭრო ომი“ საზიანო იქნება ორივე მხარისთვის. ამის შესახებ მან 3 თებერვალს ევროკავშირის ლიდერების არაფორმალური სამიტის წინ მედიასთან საუბარში განაცხადა.

კალასს ჰკითხეს დონალდ ტრამპის განცხადების შესახებ, რომ ევროპიდან შესულ საქონელზე მაღალი ტარიფების დაწესებას განიხილავს.

„რა თქმა უნდა, ჩვენც ვემზადებით ჩვენი მხრივ. სავაჭრო ომებში გამარჯვებულები არ არიან. თუ აშშ და ევროკავშირი სავაჭრო ომს დაიწყებენ, ერთადერთი, ვინც ამით გახარებული იქნება, ჩინეთია. ჩვენ ძალიან ურთიერთდაკავშირებულები ვართ. ჩვენ გვჭირდება ამერიკა და ამერიკას სჭირდება ევროპა“, - აღნიშნა კაია კალასმა.

ცნობისთვის, აშშ-ის პრეზიდენტმა დონალდ ტრამპმა განაცხადა, რომ ევროკავშირის საქონელზე ტარიფები „აუცილებლად იქნება“ და რომ ეს „საკმაოდ მალე“ მოხდება.

მან ასევე აღნიშნა, რომ დიდი ბრიტანეთი შესაძლოა, ტარიფებს დაექვემდებაროს.

ტრამპმა 1-ელი თებერვლიდან მექსიკიდან და კანადიდან იმპორტირებულ საქონელზე 25%-იანი ტარიფები დააწესა, ხოლო ჩინეთიდან იმპორტირებულზე - 10%-იანი. ამის საპასუხოდ, კანადამ და მექსიკამ 25%-იანი ტარიფები დაუწესეს ამერიკულ საქონელს.