თალიბებმა სპორტსმენ გოგონას თავი მოჰკვეთეს

ავღანეთის ფრენბურთის ახალგაზრდული ნაკრების წევრ გოგონას, მაჰჯუბინ ჰაკიმს თალიბებმა ქაბულში თავი მოჰკვეთეს. მედიის ვარაუდით, ინფორმაცია გოგონას ყოფილმა მწვრთნელმა ქალმა გაავრცელა, რომელმაც უსაფრთხოების მიზნით, ფსევდონიმი სურაია აფზალი გამოიყენა.

შემზარავი ამბავი ოქტომბრის დასაწყისში მოხდა, მაგრამ გოგონას ოჯახის წევრებმა, შურისძიების შიშით არაფერი გაამჟღავნეს. მწვრთნელის განცხადებით, ტრაგედიის შესახებ ოჯახის წევრების გარდა არავინ იცოდა. თალიბანის მოსვლამდე მაჰჯუბინ ჰაკიმი ქაბულის მუნიციპალიტეტის გუნდში თამაშობდა. მას შემდეგ, რაც ქაბულში მმართველობა შეიცვალა, ქალთა გუნდის მხოლოდ ორმა მონაწილემ მოახერხა საზღვარგარეთ გაქცევა, დანარჩენები იძულებულნი გახდნენ, საკუთარ ქვეყანაშივე დამალულიყვნენ. მათი მცდელობა რომ დახმარება მიეღოთ საერთაშორისო ორგანიზაციების მხრიდან, უშედეგო აღმოჩნდა.

რამდენიმე კვირით ადრე, 30-მდე სპორტსმენმა ქალმა  ადამიანთა უფლებების დამცველ საერთაშორისო ორგანიზაციებს მიმართა, რათა ისინი მათ ქვეყნის დატოვებაში დახმარებოდნენ, სადაც მათ სიცოცხლეს საფრთხე ემუქრებოდა. ეს მხოლოდ რამდენიმე მათგანმა შეძლო. სწორედ მათ გაავრცელეს ინფორმაცია, თალიბების მიერ აგვისტოში გუნდის კიდევ ერთი წევრის მოკვლის შესახებ.