„ათასობით ადამიანმა მიხეილ სააკაშვილის შექმნილ ციხეში წამება და დამცირება გამოიარა. ისინი ციხეში ფსიქოლოგიურად ზუსტად ამ მდგომარეობაში იყვნენ“ - გიორგი ვოლსკი

„ქართული ოცნების“ ერთ - ერთმა ლიდერმა, პარლამენტის ვიცე - სპიკერმა გიორგი ვოლსკიმ, მიხეილ სააკაშვილის განცხადებაზე კომენტარი გააკეთა.

ვოლსკის თქმით, რესურსი, რომ საზოგადოების გარკვეულმა ნაწილმა რევოლუცია მოახდინოს და მიხეილ სააკაშვილი საკნიდან ფიზიკურად დაიხსნას, არ არსებობს.

„რასაკვირველია, საკნიდან დახსნაც უკავშირდება მის გამეფებას, როგორც მას წარმოუდგენია – საკუთარ თავს გარკვეულ ისტორიულ პიროვნებებს ადარებს და თავისი თავისთვის ზუსტად იგივე მომავალი ესახება. არ ვიცი, ეს ფსიქიკურ მდგომარეობას დავაბრალო თუ ადამიანის მისწრაფებას, რომ ქვეყანა პოლიტიკური მიზნებისთვის არიოს. არ ვიცი, მისი განცხადებები რომელი კუთხიდან გავაანალიზოთ, მაგრამ ფაქტია, რომ მას ქვეყნისთვის კარგი არ უნდა.“, – აღნიშნავს ვოლსკი.

მისივე თქმით, რაც შეეხება სახალხო დამცველისა და ექიმების განცხადებას, ციხე კომფორტული ადგილი არ არის, სადაც ადამიანი თავს წყნარად გრძნობს.

„ათასობით ადამიანმა მიხეილ სააკაშვილის შექმნილ ციხეში წამება და დამცირება გამოიარა. ისინი ციხეში ფსიქოლოგიურად ზუსტად ამ მდგომარეობაში იყვნენ – ძალიან მძიმეა, როცა ხარ შეზღუდული, ხარ საკანში და გეკრძალება გასვლა, მაგრამ ადამიანებს დანაშაული აქვთ ჩადენილი და პატიმრობაში სწორედ ამის გამო იმყოფებიან.“, - ამბობს ვიცე - სპიკერი და დასძენს, რომ  მის ფსიქიკურ მდგომარეობაზე ლაპარაკი ძალიან გახშირდა და ამ მდგომარეობის გამოხატულებაა მისი მოწოდებები დესტაბილიზაციისა და რევოლუციური პროცესების განვითარებისკენ.

„მიხეილ სააკაშვილის ფსიქოლოგიურ მდგომარეობაზე ასეთი ხშირი ლაპარაკი შეიძლება იმ იდეასაც ემსახურებოდეს, რომ მდგომარეობა მძიმეა და არ შეიძლება, პატიმრობაში რჩებოდეს. ამ ფონზე „ნაციონალური მოძრაობის“ აგრესიული ჯგუფი იკრიბება და ამ ფსიქიკურად გაუწონასწორებელი ადამიანის იდეების რეალიზაციაზე საუბრობს.“, - თქვა პარლამენტარმა ვოლსკიმ.

ასევე საინტერესოა:

🔵 "დედა ძალიან ცუდად ვარ, ობიანი შავი პური გავიყოთ, ოღონდ შენთან წამიყვანე-მეთქი" - მსახიობი ლაშა გურგენიძე ბავშვთა სახლში ყოფნის პერიოდზე

🔵 "როგორც ჩანს, ყველას მოგვაგნებს, უბრალოდ დროის ამბავია" - დიანა ტრაპაიძე კოვიდინფიცირებულია

🔵 საბერძნეთის მოსახლეობის ნაწილმა, დღეს ნათლისღების დღესასწაული აღნიშნა (ვიდეო)