ჩაკვეტაძე: „ნაცმოძრაობას“, ხელისუფლებაში ყოფნის დროს ევროკავშირში ინტეგრაცია ადამიანების წამებითა და მკვლელობით წარმოედგინა, დღეს კი, მათთვის ევროპული ინტეგრაცია პარლამენტის შენობისა და პოლიციელების დაწვაზე გადის

„ვინც საგამოძიებო კომისიას თვალს ადევნებს და კოლექტიური „ნაცმოძრაობის“ გარდასახვის მაინც სჯერა, რთულია რაიმე აუხსნა“, - ამის შესახებ საპარლამენტო უმრავლესობის წევრი გიორგი ჩაკვეტაძე სოციალურ ქსელში წერს.

საპარლამენტო უმრავლესობის წევრმა იმ ადამიანებს მიმართა, რომლებიც ე.წ. ევროპულ აქციებზე დადის და 2003-2012 წლები არ ახსოვს.

„ადამიანებს კი, ვისაც არ ახსოვს 2003-2012 წლები, არც დღეს ინტერესდება ამ დანაშაულებით და ე.წ. ევროპულ აქციებზე დადის, მათ მივმართავ.

მეგობრებო, გუშინ კომისიის სხდომაზე გიორგი ზერეკიძეს მოუსმინეს. ახალგაზრდა კაცს, რომლის პიროვნებისა და ოჯახის განადგურებაც სისხლიანმა რეჟიმმა განიზრახა.

2008 წლის 8 იანვარს, 14 წლის გიორგის 10 წლიანი პატიმრობა მიუსაჯეს. როგორც კი ოჯახმა საქმე სტრასბურგში გაასაჩივრა, მათი დატერორებაც დაიწყო.

2 წლის შემდეგ, მისი მამაც დააკავეს, რომელიც 5 თვეში, 46 წლის ასაკში ციხეში გარდაცვლილი იპოვეს. ოფიციალურ ვერსიად დენის დარტყმა დასახელდა, თუმცა, ალტერნატიულმა ექსპერტიზამ წამების კვალი დაადგინა.

გიორგი ზერეკიძის სახით „ნაციონალურ მოძრაობას“ ბრძოლა ჰქონდა გამოცხადებული ახალგაზრდებთან, განსხვავებულ აზრსა და საქართველოს სახელმწიფოებრიობასთან.

მაგალითისთვის, 2010 წელს ციხეებში 142 პატიმარი გარდაიცვალა. მათი დიდი ნაწილი 35 წლამდე ასაკის იყო და სხვადასხვა სახის დაზიანებები ჰქონდა.

„ნაცმოძრაობას“, ხელისუფლებაში ყოფნის დროს ევროკავშირში ინტეგრაცია ქონების წართმევით, ადამიანების წამებითა და მკვლელობით წარმოედგინა. დღეს კი, მათთვის ევროპული ინტეგრაცია პარლამენტის შენობისა და პოლიციელების დაწვაზე გადის.

გიორგიმ, „ქართული ოცნების“ ხელისუფლებაში მოსვლის შემდეგ საპატიმრო პოლიტპატიმრის სტატუსით დატოვა. თუმცა, მისი და ჩვენი მოქალაქეების დაწყებული ბრძოლა სამართლიანობის აღსადგენად დღესაც გრძელდება.

ეს მხოლოდ ერთი მაგალითია, თუ რა ხალხთან გვქონდა და გვაქვს საქმე დღესაც. სანამ აქციებზე გასვლას გადაწყვეტთ, იცოდეთ, რომ ამ ყველაფრის ორგანიზატორები დგანან დღევანდელი ე.წ. პროტესტის სათავეშიც“, - წერს ჩაკვეტაძე.