აზერბაიჯანის საგარეო: მიზანშეწონილი იქნებოდა, საფრანგეთმა, რომელიც ცდილობს ჩაერიოს სხვა ქვეყნების სასამართლო პროცესებში, გამოიკვლიოს ისეთი ფაქტები, როგორიცაა პოლიტიკური დევნა საკუთარ ქვეყანაში და მომიტინგეების მკვლელობები

მოვითხოვთ საფრანგეთისგან შეწყვიტოს ნაბიჯები, რომლებიც არ ემსახურება მშვიდობას და ძირს უთხრის რეგიონის სტაბილურობას - განაცხადეს აზერბაიჯანის საგარეო საქმეთა სამინისტროში.

აზერბაიჯანის საგარეო უწყებაში ხაზგასმით აღნიშნეს, რომ კატეგორიულად უარყოფენ ბრალდებებს, რომლებიც 2 აპრილს საგარეო საქმეთა მინისტრმა, ჟან-ნოელ ბარომ წამოაყენა აზერბაიჯანსა და სომხეთს შორის სამშვიდობო პროცესთან და სომხური წარმოშობის პირთა სასამართლო პროცესთან დაკავშირებით.

„თუ, როგორც საფრანგეთი აცხადებს, ის ნამდვილად მხარს უჭერს სამშვიდობო შეთანხმების სწრაფად ხელმოწერას, მაშინ მან სომხეთი უნდა წაახალისოს შესაბამისი ნაბიჯების გადადგმისკენ. რაც შეეხება სამხედრო დანაშაულებებში, ეთნიკურ წმენდაში, სამხედრო აგრესიაში, წამებასა და სხვა მძიმე დანაშაულებებში ბრალდებულ ან მსჯავრდებულ სომხური წარმოშობის პირთა გათავისუფლების მოწოდებებს, ამ დანაშაულების გამოძიება და მათზე სასამართლო პროცესის ჩატარება აზერბაიჯანის უფლებაა“, - ნათქვამია განცხადებაში.

„მიზანშეწონილი იქნებოდა, საფრანგეთმა, რომელიც ცდილობს ჩაერიოს სხვა ქვეყნების სასამართლო პროცესებში, ჯერ გამოიკვლიოს ისეთი ფაქტები, როგორიცაა პოლიტიკური დევნა საკუთარ ქვეყანაში და მომიტინგეების მკვლელობები სხვადასხვა აქციაზე, ადგილობრივი მოსახლეობის წამება ზღვისიქითა ტერიტორიებზე საფრანგეთის ნეოკოლონიური პოლიტიკის შედეგად, მექრთამეობისა და კორუფციის გავრცელება საფრანგეთის პარლამენტში“, - განაცხადეს აზერბაიჯანის საგარეო უწყებაში.