თეა წულუკიანი: სალომე ზურაბიშვილი, რომელიც ალბათ უკვე უნდა მიხვდეს, რომ ვერ ჩამოყალიბდა ლიდერად, ვერც „ქართული ოცნების“ პირობებში, ვერც მასთან დაპირისპირებაში, ის საქართველოსთვის ლიდერი ვერასდროს იქნება. თავად ამას ვერ იგებს, არ იგებს

სალომე ზურაბიშვილი, რომელიც ალბათ უკვე უნდა მიხვდეს, რომ ვერ ჩამოყალიბდა ლიდერად, ვერც „ქართული ოცნების“ პირობებში, ვერც მასთან დაპირისპირებაში, ის საქართველოსთვის ლიდერი ვერასდროს იქნება. თავად ამას ვერ იგებს, არ იგებს, - განაცხადა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებით საგამოძიებო კომისიის“ ხელმძღვანელმა, პარლამენტის ვიცე-სპიკერმა თეა წულუკიანმა გადაცემაში „იმედი LIVE“.

წამყვანმა მას ჰკითხა, რა შანსები აქვს სალომე ზურაბიშვილს გახდეს ოპოზიციის ლიდერი და ხელისუფლების მთავარი ოპონენტი.

„იმედი მაქვს, ჩვენი კომისიის დასკვნა მნიშვნელოვანი დოკუმენტი იქნება საიმისოდ, რომ ის რამდენიმე დანაშაულებრივი პარტია, ვეღარ იყვნენ ჩართულნი პოლიტიკურ პროცესში. დანაშაულებრივი იმიტომ, რომ უკვე იყვნენ ხელისუფლებაში და დანაშაულებრივი რეჟიმი ჩამოაყალიბეს, დღეს არ აქვს მნიშვნელობა, რომელს რა ჰქვია - ხაზარაძემ „ლელო“ დაირქვა, „ნაციონალური მოძრობა“ დაიქსაქსა. ეს არის ჩვენი პოლიტიკური მიზანი იმიტომ, რომ უბრალო არ აქვთ უფლება, ფიქრობდნენ ხელისუფლებაში დაბრუნებაზე იმიტომ, რომ მოხდება იგივე. მათ სხვანაირად არ შეუძლიათ ქვეყნის მართვა. რაც შეეხება სალომე ზურაბიშვილს, ან ამ კომისიას რამდენად შეუძლია, რომ ისინი [ოპოზიცია] საბოლოოდ გაანადგუროს, ასე ვიტყოდი, რომ ჩვენ ჩვენს მიზნებს და პროცედურებს არ ვმალავთ, ღიად ვიბრძვით, სამართლიანადაც, ასე მწამს, მაგრამ მათ არ სჭირდებათ ეს კომისია იმისთვის, რომ განადგურდნენ, რადგან ისინი უკვე არიან განადგურებულები.

აქ საუბარია უბრალოდ ამის სამართლებრივად გაფორმებაზე. მათ არანაირი უნარი არ აქვთ, რომ თუნდაც ადგილობრივ თვითმმართველობის არჩევნებში ღირსეულად შევიდნენ, შესაბამისად, მსჯელობენ იმაზე, მიიღონ თუ არა არჩევნებში მონაწილეობა სწორედ ამის გამო. სალომე ზურაბიშვილი, რომელიც ალბათ უკვე უნდა მიხვდეს, რომ ვერ ჩამოყალიბდა ლიდერად, ვერც „ქართული ოცნების“ პირობებში, ვერც მასთან დაპირისპირებაში, ის საქართველოსთვის ლიდერი ვერასდროს იქნება. თავად ამას ვერ იგებს, არ იგებს, არ მგონია, რომ ჩვენი ეთერის შედეგად ამას გაიგებს და არის ქართული ანდაზა, რომელიც ალბათ არ იცის, ან თუ იცის, ვერ გამოთქვამს, რომელიც გულისხმობს, რომ „მიუშვი ნებასაო“. ამიტომ ალბათ უნდა მივუშვათ ნებასა, ისედაც თავის ნებაზეა და საბოლოოდ ყველაფერი მორიგი კრახით დასრულდება“, - აღნიშნა წულუკიანმა.