კახა ლაბუჩიძე ბიძინა ივანიშვილზე: დაასანქცირეს ადამიანი, ვინც ქველმოქმედებებს არ ითვლის, აურაცხელ სიკეთეს აკეთებს, პატრიოტიზმს რომ ებრძვიან, ამის ულევი მაგალითები გვაქვს

 „დაასანქცირეს ადამიანი, ვინც ქველმოქმედებებს არ ითვლის, აურაცხელ სიკეთეს აკეთებს, პატრიოტიზმს რომ ებრძვიან, ამის ულევი მაგალითები გვაქვს,“ - ასე გამოეხმაურა თბილისის საკრებულოს წევრი, კახა ლაბუჩიძე აშშ-ის სახაზინო დეპარტამენტის მიერ „ქართული ოცნების“ საპატიო თავმჯდომარის, ბიძინა ივანიშვილის სანქცირებას.

„დაასანქცირეს ადამიანი, ვინც ქველმოქმედებებს არ ითვლის, აურაცხელ სიკეთეებს აკეთებს, ეროვნულ საგანძურს სამშობლოშივე აბრუნებს და ქვეყნის კეთილდღეობის გამო თავგანწირვით ებრძვის მანკიერ, დანაშაულებრივ და ბოროტმოქმედ სისტემას, რომელმაც ადამიანის უფლებები სრულად შელახა ქვეყანაში მრავალი წლის მანძილზე.

დაასანქცირეს პერსონა, ვინც სიტყვა თავისუფლება ყველაზე სწორ ლექსიკურ შესატყვისად აქცია. დაასანქცირეს ეროვნულობისთვის, რადგან იმპერიათა გზაჯვარედინზე არავის უღელის დადგმა არ ისურვა. ამ კაცმა ყველაზე კარგად დაამტკიცა ილიას სიტყვის ერთგულება "ჩვენი თავი ჩვენადვე გვეყუდნეს".

პატრიოტიზმს რომ ებრძვიან, ამის ულევი მაგალითები გვაქვს ისტორიაში. გლობალური სამყარო დღეს მუქარის და შანტაჟის ენით ელაპარაკება და ამას დემოკრატიის შუქურის ანარეკლად ასაღებენ. მაგრამ ესეც ჩაივლის.

მდინარის ღელეს შლამიც გამოედევნება, მაგრამ ნაკადულებიც არ კარგავენ სისუფთავეს. თაობა მიდის, თაობა მოდის. სიმართლე ის კელაპტარია, რომელიც ამ ბნელეთშიც ღირსეულად გამოანათებს. მჯერა, ესეც ჩაივლის ჩვენს საკეთილდღეოდ! მჯერა სახელოვნად გავიმარჯვებთ!“, - წერს ლაბუჩიძე სოციალურ ქსელში.